DILI, STLTIMORLESTE.com – Konselhu Ministru mos aprova projetu Rezolusaun Governu neebe aprezenta husi Primeiru Ministru (PM) Kay Rala Xanana Gusmão, kona-ba Konta Satelite Tasi nian.
“Objetivu husi Rezolusaun Governu ida nee mak atu implementa pilar 15 husi Polítika no Planu Asaun Ekonomia Azul, hodi kria baze ba implementasaun Konta Satelite Tasi nian, nuudar instrumentu estatístiku neebe dezena atu sukat ho rigor kontribuisaun husi ekonomia tasi nian ba ekonomia nasional,” haktuir nota komunikadu imprensa neebe STL asesu husi media Ministru Prezidensia Konselhu Ministru, Sesta (20/02/2026).
Konta Satelite Tasi nian sei permite rekolha, organizasaun no analize dadus kona-ba despeza publika no, iha etapa tuirmai, kona-ba atividade ekonomika publika no privada neebe relasiona ho setor tasi nian, hodi integra informasaun nee iha Konta Nasional sira.
Tan nee, Diresaun Jeral Planeamentu Orsamental no Institutu Nasional Estatistika Timor-m Leste, IP, sei servisu hamutuk ho Gabinete Fronteiras Terrestres no Maritimas, sei define metodolojia, indikador ekonomiku relevante sira, no mos mekanizmu rekolla no prosesamentu dadus neebe nesesariu.
Prevee mos katak, iha prazu fulan neen nia laran hafoin rezolusaun tama iha vigor, sei aprezenta relatoriu ida ba Ministra Finansas no Primeiru Ministru kona-ba pontu situasaun obra nian no roteiru ida ba estabelesimentu Konta Satélite Tasi nian, no mos konsolidasaun markador orsamental ba Ekonomia Tasi iha Orsamentu Jeral Estadu nian hahu husi tinan 2027 ba oin.
(alb)
