DILI, STLTIMORLESTE.com – Maski Timor Leste ukun aan tinan rua nulu resin ona, maibe problema klasiku kona-ba bee moos iha kapital Dili, liu liu iha area Tasi Tolu seidauk iha solusaun neebe diak, komunidade sira iha neeba tenke fakar osan barak hodi sosa bee husi kareta tanki privadu sira.
Komunidade sira iha suku Komoro liu liu area Lagoa Tasi Tolu, tenki gasta osan entre US$ 6 too US$ 10 semana semana hodi sosa bee.
“Ami moris hanesan nee kleur ona, osan neebe loloos sosa sosa oan sira nia presiza, ami uza fali hodi sosa bee, se la sosa ami labele fase, haris, tein no seluk tan,” dehan Mariana Xavier, inan feton ida neebe hela iha Tasi Tolu ba STL, Tersa (24/02/2026).
Aleinde bee neebe karun, komunidade sira mos preokupa ho kualidade bee sosa husi karreta tanki, dala barakl bee nee iha kor uituan no iha morin neebe la kumpri kriteira saude nian.
“Tanba nee ami husu ba governu atu labele tau matan deit ba area seluk neebe iha Dili laran, maibe haree mos ba ami neebe hela iha area Tasi Tolu neebe susar hetan bee mos neebe fornese husi SAS,” hatete Mariana.
Entretantu Observador Politika, Nuno Trindade da Costa hatete, bee mak elementu fundamental liu ba moris, maski mundu nee nakonu ho bee, maibe bee neebe moos no seguru ba konsumu mak sai hanesan dezafiu boot ida ba povu barak.
(car)
