DILI, STLTIMORLESTE.com – Prezidente Republika (PR), Jose Ramos Horta hasoru malu ho Primeiru Ministru Reinu Kamboja Samdech Thipadei Hun Manet, hodi hametin bilateral no kooperasaun Rejional.
Lider nain rua, Prezidente Republika Jose Ramos Horta ho Primeiru Ministru Reinu Kamboja Samdech Thipadei Hun Manet hasoru malu iha Genebra, bainhira partisipa Direitus umanus.
Prezidente Republika, Jose Ramos Horta halao sorumutu informal ida ho Samdech Thipadei Hun Manet, Primeiru Ministru Reinu Kamboja nian. Sorumutu nee akontese iha Palasiu Nasoins Unidus (Palais des Nations) iha Genebra, Suísa, iha marjen Sesaun da-61 Konsellu Direitus Umanus Nasoins Unidus nian.
Durante sorumutu nee, líder nain-rua troka hanoin ho produtivu kona-ba kestaun bilateral no rejional, hodi hametin liutan lasu amizade no kooperasaun entre Timor-Leste no Kamboja.
“Diskusaun nee foka liuba dedikasaun hamutuk hodi promove pas, dezenvolvimentu sustentavel, no progresu ba direitus umanus iha rejiaun Sudeste Aziatiku,” haktuir husi Komunikadu neebe STL asesu husi media Prezidensia Republika Kuarta (25/02/2025).
Dialogu nee hatudu kompromisu Prezidensia nian hodi konsolida relasaun diplomatika neebe forte no hametin prezensa ativa Timor-Leste nian iha komunidade internasional. Líder nain-rua reafirma importansia husi kolaborasaun kontinuada iha forum multilateral sira hodi garante estabilidade rejional no promosaun ba valor global sira.
Aleinde nee Prezidente Republika, mos hasoru malu Ministru Negosiu Estranjeiru Angola nian, Tete Antonio, Durante sorumutu nee, Xefe Estadu hatoo apresiasaun boot Timor-Leste nian ba lideransa Prezidente João Lourenço nian iha Uniaun Afrikana, liuliu hodi foti-aas Angola nia esforsu proativu sira hodi promove dame, estabilidade no seguransa iha kontinentu Afrikanu laran.
Prezidente Ramos-Horta mos foti-aas afinidade istorika no polítika neebe klean entre Timor-Leste no Angola, neebe bazeia ba sira-nia luta hanesan ba independensia no konsolidasaun Estadu de Direitu neebe halao hela.
Xefe Estadu reafirma importansia multilateralizmu no koperasaun entre nasaun sira neebe defende valor komun sira, hanesan soberania nasional, autodeterminasaun povu sira-nian no promosaun direitus umanus iha mundu tomak.
Hateke ba oin, parte rua nee manifesta interese boot hodi reforsa relasaun bilateral no hametin koperasaun Sul-Sul iha domíniu diplomatiku, ekonomiku no kultural. Líder sira mos rekoñese Comunidade dos Países de Língua Portuguesa (CPLP-sigla portuges) nuudar plataforma vital ba konsertasaun polítiku-diplomatika, hodi emfatiza ninia papel iha promosaun lian portuges no defeza ba interese komun sira iha forum multilateral internasional sira.
(eme)
