DILI, STLTIMORLESTE.com – Governu liu husi Ministeriu relevante presiza halo investigasaun rigorozu ba sidadaun pesoal Migrasaun neebe fasilita sidadaun feto husi Republika Indonezia (RI) hakat liu Fronteira ho pasaporte mate neebe viral iha media sosial.
Kestaun nee hatoo husi Visi Diretor Hak, Antonino de Limas ba jornalista sira iha knaar fatin Farol, Kuarta (25/02/2026).
Nia hatete, ida nee kestaun ho lei neebe estabelesidu karik polisia migrasaun mak komete aktu sira hanesan nee presiza investigasaun duni.
“Tanba ida nee sai ona ba publiku, presiza investigasaun, nunee ba futuru aktu sira nee la akontese, tuir buat neebe hau hatene tuir lo-loos pasaporte nee mate ona ou liu prazu baibain nee iha sansaun ka renova lai mak liu, maibe fasilita hodi liu nee kontra lei, presiza investiga,” dehan Visi Diretor Hak.
Nia hatete, baibain kuandu pasaporte mate ona presiza multa ou renova fali tuir lei neebe mak estabelesidu, pasaporte mate maibe hakat liu ida nee osan neebe multa nee ba ema individu ka ou ka ba duni sistema selu ba estadu, ida nee presiza investigasaun tanba sai ona ba publiku presiza investigasaun nunee bele klareza lo-loos nee mak ida neebe? Nunee labele fo impkatu iha migrasaun,” dehan Visi Diretor HAK.
Nunee mos Akademista husi UNTL, Judite Dias Ximenes hatete, lo-loos nee funsionariu migrasaun tenke halo servisu neebe lo-loos, nunee bele halo identifikasaun ba sidadaun neebe tama sai husi Fronteira, maibe pesoal sira nee mak fasilita tiha sasan ilegal bele tama sai rai laran.
Liga ho kazu neebe foin lalais viral iha media sosial sidadaun feto ida neebe hatete tanba deit fo nomor WhatsAap ba pesoal membru imigrasaun ida iha fronteira ikus haruka sidadaun nee liu, maske pasaporte mate ona, kazu hanesan nee presiza investiga.
“Se instituisaun sira dehan deskonfia, signifika kazu iha tenke halo asaun hodi investiga, labele dun deit kazu maibe nia rejultadu investigasaun laiha, se instuisaun importante mak deskonfia maibe dun deit la halo asaun ruma ida nee lalos, no labele deskonfia deit maibe tanba instituisaun nia kredibilidade, tenke halo investigasaun para hatudu nee los ka lae,” dehan akademista nee.
Ativista Feto hatete, Governu liu husi Ministeriu neebe relevante presiza halo investigasaun ba membru pesoal nee, nunee karik nia halo duni asaun nee presiza kondena nia aktu neebe nia halo tuir saida mak nia halo.
(eme)
