DILI, STLTIMORLESTE.com – Eis Prezidente Rejiaun Administrativu Espesial Oecusse Ambeno (RAEOA), atual Sekretariu Jeral partidu FRETILIN, Mari Bin Amude Akatiri, marka prezensa iha edefisiu Prokuradoria Jeral Republika (PJR), Kolmera, Dili.
Mari too iha edefisiu PJR, iha loron Kuarta (25/02/2026), maizumenus oras tuku 9:20 dader, ho kareta xapa matrikula A.21.208 TL, akompanha husi nia eskoltu Korpu Seguransa Pesoal (CSP) no Advogada Privada balu, hodi lao tama ba iha Gabinete Sentral Kombate Korupsaun no Krime Organizadu (GCCCO) hodi submete ba presta deklarasaun.
Hafoin presta tiha deklarasaun iha minutu balu, no iha oras tuku 10 liu minutu balu, Mari sai husi edefisiu nee hodi fila ba nia fatin.
Banhira jornalista tenta konfirma kona-ba prezensa iha Ministeriu Publiku, nia parte hateten, ba ho faru mean hatudu katak sei menan.
“Hau la konvida imi, imi mai halo saida, hau mai ho mean, hau dehan ona mean nee tenke menan,” dehan Mari hafoin presta deklarasaun iha MP.
Tuir informasaun neebe iha, Mari presta deklarasaun iha Ministeriu Publiku, relasiona ho projetu sira neebe iha Zona Espesial Ekonomia Merkadu Sosial (ZEEMS) inklui akizasaun ba Roo Haksolok.
(ter)
