DILI, STLTIMORLESTE.com – Edifisiu tuan Tribunal Judisial Primeira Instansia Dili (TJPID) neebe lokaliza iha Mandarin, hahu ona halo reabilitasaun atu sai hanesan edifisiu temporariu ba iha Supremu Tribunal Justisa (STJ).
“Agora ita komesa hadia uma tuan nee instalasaun temporariu iha neeba, hodi hein konstrusaun foun iha sorin Kaikoli besik Tribunal Rekursu nee,” dehan Prezidente Tribunal Rekursu, Afonso Carmona ba jornalista sira iha Tribunal Dili, Kuarta (25/02/2026).
Nia hatutan, prepara mos trenu ofisial justisa sira neebe mantein iha Tribunal Primeira Instansia, Tribunal Rekursu no mos Tribunal Supremu. No prepara mos funsionariu tekniku sira tama hotu iha pakote preparasaun nian, atu instalasaun remata, iha pakote boot ida preparadu atu ba halao servisu iha neeba.
Nia sublina, kona-ba orsamentu ba STJ seidauk preve sei sura hela, maibe sei instala ho andar lima.
Hatan kona-ba promosaun ba iha Juiz sira, nia parte dehan iha fulan Abril banhira Inspetor neebe halo inspesaun ba Juiz sira fo sai ona rezultadu mak sei halo reuniaun ida hodi haree kona-ba promosaun nee.
“Promosaun ba Juiz liga ho rezultadu inspesaun no prosesu lao hela, hau hanoin Abril bele ona, tanba Inspetor halo avaliasaun ba Juiz ida idak,” dehan nia.
Nia hatutan, kuandu iha fulan Abril rezultadu inspesaun nian iha ona mak sei iha reuniaun ida atu haree promosaun ba Juiz neebe ba iha Primeira klasse no segunda klasse, inklui mos Juiz foun sira neebe halao hela estajiu.
Nia esplika, iha ona reuniaun mak foin relata ba iha Prezidente Republika.
Iha fatin ketak, Jurista Sergio Dias Quintas dehan, nesesariu estabelese SJT.
“Uma vez ke estadu Timor Leste hasoru hela dezafiu, maibe hau nia hanoin nesesariu hodi estabelese Supremu Tribunal Justisa, tanba durante nee hirarkia Tribunais seidauk kumpletu,” dehan Sergio.
Nia hatutan, durante nee servisu Trbunais seidauk maximu, tanba nee mak wainhira estadu iha politika hodi harii STJ nee hatudu katak, estadu iha seriedade ba setor justisa.
Nia argumenta, STJ hanesan orgaun soberania estadu nia iha poder judisial hodi tesi lia iha materia sivil no krime, wainhira sidadaun sira husu no orgaun soberania estadu seluk solisita.
Sergio konsidera, majistradu no jurista lubuk ida mak iha ona kapasidade hodi ezerse nia funsaun nuudar Juiz iha STJ.
(ter)
