DILI, STLTIMORLESTE.com – Benifisiariu neebe lei fo dalan atu deklara rikusoin iha obrigaasaun atu deklara rikusoin, se la deklara mak sei halo krime dezovidensia.
“Tuir lei kada tinan tenke deklara, se sira la halo sira halo fali krime dezovidensia, hau nia hanoin ba deklarasaun rikusoin la iha problema, tanba se sira la deklara karik sira halo krime dezovidensia,” dehan Prezidente Tribunal Rekursu, Afonso Carmona ba jornalista sira iha Kaikoli, Kuarta (25/02/2026).
Nia hatutan, too agora seidauk deteta nain hira mak komete dezovidensia tanba seidauk iha relatoriu, banhira husi Komisaun Anti Korupsaun (KAK) relata ona mak foin hatene se mak seidauk rejista.
Nia sublina, balu la rejista tanba mate no balu la rejista tanba moras notifika atu sira halo kompletu, maibe kona-ba nain hira mak komete dezovidensia too agora seidauk iha relatoriu kona-ba ida nee.
Nia esplika, deklarasaun nee liu husi sistema online, nia kestaun mak formulariu online neebe prienxe ona, husi parte Komisaun Anti Korupsaun (KAK) halo monitoring ka lae.
Kuandu KAK deklara aplikante balu seidauk prienxe mak sei notifika sira, se notifika mak nia la kumpri deklara katak krime dezovidensia. No deklara rikusoin nee iha parte rua, ida ba iha KAK no entidade relevante sira ba iha Tribunal Rekursu (TR).
Iha fatin ketak, Akademiku UNTL, Sebastiao Dos Santos dehan, hanesan entidade neebe diak tenke hakruk ba lei sira neebe iha.
“Tenke hakruk ba lei neebe iha atu deklara rikusoin, ida nee hanesan parte ida importante atu tulun servisu KAK nian,” dehan nia.
Nia afirma, tenke kolabora atu deklara rikusoin hodi labele komete krime neebe iha, hanesan sidadaun Timor koopera ho regra sira neebe iha.
(ter)
