AMBENO, STLTIMORLESTE.com – Komunidade Suku Cutete agradese ba vizita Ministru Obras Publiku (MOP) iha loron Tersa (24/02/2026), vizita sarani no povu area remotas Suku Nipane, Aldeia Bausiu, Bairru Nun Ana, governu autoridade RAEOA liu husi Diresaun Rejional Infraestrutura, konsege normaliza hikas estrada neebe kotu iha Bairu Sikone, Suku Bobokase Oecusse.
Tuir Marcos Elu nuudar Povu Kutete dehan, agradese ba vizita MOP, ba komunidade Nun ana, governu autoridade konsege normaliza hikas estrada neebe kotu iha Bairru Sikone, sei horbain rua Ministru la ba karik, ohin loron povu Kutete, Nun Ana ho komunidade suku vizinhu sira la bele uza transporte publiku hodi halo movimentu tanba estrada nee kotu iha vizita Primeiru Ministru (PM) Kay Rala Xanana Gusmão vizita povu Cutete no Nun Ana, konsege normaliza iha dia 20 de Janeiru 2026 no iha loron 21 Janeiru PM vizita, maibe kalan nee akontese udan boot, rai nee monu kedan, no iha vizita MOP iha loron 24 Fevereiru, governu autoridade foin normaliza.
“Ami agradese ba MOP nia vizita ba Nun Ana, Governu halo intervensaun lalais, selae hanesan tinan kotuk liu ba, kuaze tinan ida resin maka foin governu autoridade normaliza estrada nee, selae ami la bele lori ami nia produtu ba merkadu,” dehan Marcos Elu ba STL iha sidade Oecusse, Kinta (26/02/2026).
Iha biban nee, nia husu ba governu sentral atu kontinua mai vizita povu Oecusse hodi nunee halo lalais intervensaun neebe povu enfrenta tanba projetu emerjensia neebe halo husi kompanhia Toms Building husi Nun Ana ba Leolbatan, Suku Monemeko, remata ona, maibe sedauk ateru too neeba, nunee ho prezensa ukun nain sira husi nasional, fanu kompanhia sira neebe kaer obra emerjensia sira nee, bele finaliza ona estrada nee.
Iha sikun seluk Marta Quebo nuudar povu Cutete sente kontente tanba iha loron Tersa, derpenti deit kareta lubuk ida ba fronteira Nun Ana.
“Ami hakfodak, derrpente deit kareta lubuk ida, liu husi ami nia knua Kutete ba Nun Ana, tanba nee maka ami dehan, estrada karik diak ona maka karreta sira nee mai ami nia knua, ami sente kontente no agradese ba governu sentral no governu autoridade komesa normaliza ona ami nia estrada nee,” dehan Marta.
Tuir Diretor Rejional Infraestrutura, Remigio Nuno Sila katak, relasiona ho planu MOP vizita komundade Nun Ana tanba simu orientasaun husi PM Kay Rala Xanana Gusmão ba Ministru Samuel Marcal atu vizita sarani no komunidade Bairru Nun Ana, tanba nee iha loron 23 Fevereiru 2026, haruka kedan, ekipamentu husi Institutu Jestaun Ekipamentu (IGE), normaliza kedan estrada revere.
Tuir observasaun STL iha vizita MOP ba Nun Ana, too dalan neebe kotu iha Sikone, Ministru Obras Publiku, Samuel Marcal observa kedan kondisaun estrada refere no konversa ho komunidade sira iha Sikone maka kontinua viajen ba vizita sarani no povu iha Kapela Nun Ana.
(jos)
