DILI, STLTIMORLESTE.com – Maski kalendariu ba Eleisaun Prezidensial iha Timor Leste (TL) sei halao iha tinan 2027, maibe movimentu politiku husi figura no kandidatu potensial sira komesa haburas aan ona iha media sosial, liu-liu iha plataforma Facebook.
Fenomenu nee sai hanesan estratejia ida hodi dada atensaun publiku, no sukat sira nia popularidade antes tempu kampanha ofisial nian too.
Iha fulan hirak ikus nee, tuir observasaun jornalista STL nian iha media sosial haree katak, figura politiku balu, tantu foinsae no mos veteranu sira, komesa ativu kria pajina pesoal no kria konteudu neebe hatudu sira nia atividade sosial, hanoin no vizaun ba futuru Estadu nian.
Maibe tuir Observador Politiku, Mateus de Araujo katak, buat neebe akontese iha Faceebook nee bele konsideira kampanha silensiu ho objetivu halo povu konhese diak liu tan sira nia figura, neebe haree liu husi Like, Comment no Share hodi hatene sese mak hetan apoiu barak.
“Hau hanoin figura sira neebe agora komesa haburas ka hatudu sira nian aan ona iha Facebook nee hanesan fahe hanoin kona-ba dezemvolvimentu nasional hodi dada fuan eleitor foinsae sira neebe barak liu uza internet,” dehan Mateus ba STL, iha Mandarin, Dili, Segunda (02/03/2026).
Nia dehan, iha funu algoritmu nee, popularidade laos ona foka ba deit konteudu, maibe ba sese mak bele kria interasaun boot liu.
Iha parte ketak Akademista UNPAZ, Domingos Xavier komesa sensivel ba mudansa imajen husi figura sira nee. ”Ita haree kampanha nee lao sedu tebes iha Facebook, hanesan estudante ami tenke matene hodi lee sese mak servisu loloos no sese mak halo deit dezenu iha Facebook,” dehan Domingos.
Maski kampanha iha Facebook lao makas, parte Sekretariadu Tekniku Admistrasaun Eleitoral (STAE) foin mak tama ba faze preparasun tekniku ba tinan 2026 nian hanesan, atualizasaun baze dadus eleitoral no resensiamentu biometriku.
Autoridade eleitoral sira nafatin husu ba sidadaun hotu atu kidadu ho informasaun falsu (hoax), neebe dala barak mosu iha media sosial hodi hamosu tauk ka konfuzaun antes kampanha ofisial sira hahu.
(car)
