BAUKAU, STLTIMORLESTE.com – Segundu Komadante FALINTIL Rejiaun III, Cornelio Gama “L7” atual Prezidente Konselhu Munisipal Kombatentes Libertasaun Nasional (CMCLN – sigla português) Baukau, baixa iha sala emerjensia Hospital Rejional Eduardo Ximenes (HoREX) Baukau, tanba moras kotuk laran no pulmaun kanek.
Diretor Klinika HoREX Baukau, Mediku Mozinho Francisco da Costa Belo informa, Hospital Rejional Eduardo Ximenes Baukau liu husi mediku sira simu Segundu Komadante FALINTIL Rejiaun III, Cornelio Gama “L7” iha sala emerjensia, iha loron 25 Fevereiru tinan nee, tanba hetan moras iha parte kotuk laran, nunee mediku sira halo ezameninasaun neebe rezultadu ezaminazaun hatudu, pasiente refere infrenta mos pulmaun kanek.
“Nia momentu mai nee sente moras lao labele mai ami halo konsulta, raisis hasai ran detekta moras iha pulmaun, nee mak doutor espesialista sira deside nia baixa para fo tratamentu antibiotiku too agora. Nia moras nee bele mos idade, servisu makaas viajen hela deit fatores sira nee mak halo nia, liu-liu mak idade,” Diretor Klinika HoREX Baukau, Mediku Mozinho Francisco da Costa Belo informa ba jornalista sira iha sala emerjensia HoREX Baukau, Segunda (02/03/2026).
Nia sublina, moras neebe pasiente refere infrenta, tanba kauza idade no menus deskansa halao servisu todan, nunee bainhira mediku sira remara halo ezameninasaun ba nia kondisaun sira halo karta transferensia ba pesiense refere atu ba kontinua halao tratamentu iha Hospital Nasional Guido Valadares (HNGV) Dili, maibe pasiente rasik lakohi.
Nunee durante inisiu baixa too ohin loron iha sala emerjensia pasiente refere nia kondisaun jeral diak, no daudaun nafatin baixa iha sala emerjensia kuartu kardiolojia.
“Kondisaun jeral too agora diak. Tuir informasaun husi espesialista ohin atu bele alta mais sei haree ba rejultadu, mais diak liu nia sei iha nee deskansa para rekupera diak tiha lai mak ita fo alta,” Mozinho katak.
Pasiente Cornelio Gama “L7” agradese ba mediku no espesialista sira iha HoREX, tanba durante baixa fo atendimentu diak no daudaun kondisaun saude hahu diak.
“Kona-ba moras neebe foin daudauk akontese ba hau nia isin loron tolu haat nee komesa sente diak ona. Doutor sira mos sustenta diak ai-moruk mos mai didiak hau simu ohin loron nee hau sente diak oituan ona se alta karik hau kontinua hau nia servisu familia nian Konselhu Veteranus nia, tanba ita ukun aan preokupa ita nia nasaun apoiu malu, apoiu ita nia Governu atu nunee ita nia progresu dezenvolvimentu nee hanesan nasaun sira seluk,” L7 espresa.
Husi sala emerjensia iha nia kartu baixa fatin ba konsulta kardiolojia nian, Segundu komadante FALINTIL Rejiaun III, Cornelio Gama “L7 nafatin mehi, bainhira alta husi fatin baixa, mezmu idade ona, maibe nafatin iha espiritu kontribui ba prosesu dezenvolvimentu nasaun nian no liu liu ba nesesidade ba familia nian.
Tanba Maromak kriador rai no lalehan orienta nia ema ida moris iha mundu atu servisu hodi sustensa familia too bainhira Maromak deside destinu. No prisipiu Segundu Komadante FALINTIL Rejiaun III, Cornelio Gama “L7” nain mak perdua no kariedade ba malu ba moris neebe diak.
L7 ho oin hamnasa husu veteranus sira iha teritoriu nasional atu konsolida opinioes komum haree problema dezenvolvimentu iha rai laran nunee Timor Leste bele sai nasaun dezenvolvidu hanesan nasaun sira seluk.
(tom)
