DILI, STLTIMORLESTE.com – Stok kaderneta pasaporte iha ona faze produsaun, tanba nee bainhira pagamentu remata sei haruka mai iha faze rua, husi faze primeiru no faze segundu.
“Stok agora iha produsaun ona, agora hein para atu haruka mai, haruka primeiru mai rihun 10, fulan Abril remata sei haruka tan segunda faze kompletu mai rihun 60,” dehan Diretor Rejistu Notariadu, Agustinho Gonsalves Viera ba jornalista sira iha Mandarin, Segunda (02/03/2026).
Nia hatutan, ita nia sistema iha lei foun, ida nee mos hola parte hotu no osan aprova hotu ona, hein manda osan ba kompanhia nia konta bankaria, atu sira bele haruka kaderneta pasaporte mai.
Nia esplika, produsaun pasaporte iha nasaun Polandia, no kaderneta pasaporte neebe iha kualidade diak no okupa numeru ba dala rua iha ASEAN.
Nia dehan, haree ba iha pagamentu, se pagamentu husi Ministeriu Finansa sedu mak kaderneta pasaporte sei mai sedu, se pagamentu tarde mak kaderneta pasaporte mos sei mai tarde.
Hatan kona-ba blanko ba Bilhete Identidade, nia parte dehan, iha asesoris balu seidauk kompletu, tanba nee mak imprime limitadu.
“Agora blako iha, soke limitadu, tanba ho nia asesoris, se nia asesoris ida la iha labele imprime, hanesan blanko iha se asesoris ida la iha labele imprime ona, nia iha paket ida kuandu ida la iha ona labele imprime,” dehan nia.
Nia argumenta, iha balkaun uniku imprime ba iha orijinal lao normal hela, maibe tenke liu husi sistema online, sira marka loron ida simu ema nain 50.no labele liu husi nee.
Nia deban, hologram nee la iha labele imprime, no atu sosa hologram tenke haree mos ba iha orsamentu, atu sosa faze por faze, tanba nee uza lai ida provizoriu hodi hein ida original nee.
Iha fatin ketak, Akademiku UNTL, Rafael de Jesus dehan, presiza duni iha stok kaderneta pasaporte.
“Hanoin ohin loron Timoroan barak mak buka moris sai ba iha rai liur, tanba nee presiza duni stok kaderneta pasaporte, atu labele mosu fali problema hanesan tinan balu liu ba,” dehan nia.
Nia hatutan, trata pasaporte selu ho osan, tanba nee husu atu sistema funsiona ho diak, nunee atende aplikante sira neebe ba trata ho lalais.
(ter)
