DILI, STLTIMORLESTE.com – Relasiona ho informasaun neebe fo sai katak, atu trata dokumentus sira neebe ligasaun ho Notariadu tuir lei tenke selu, ida nee seidauk implementa, tanba hein lai servisu husi BCTL nian.
“Agora ita hein husi BNCTL deit, se BNCTL halo nia servisu hotu ona ita realiza, rejistu la selu ida maibe trata dokumentus sira hotu ona foin bele selu hodi foti,” dehan Diretor Rejistu Notariadu, Agustinho Gonsalves Viera ba jornalista sira iha nia knaar fatin Mandarin, Segunda (02/03/2026).
Nia dehan, ida nee sei implementa ba iha dokumentus hanesan rejistu kriminal, bilhete identidade, no sertidaun moris, ba trata gratuitu la selu maibe banhira trata dokumentus sira hotu ona atu foti kada ema ida tenke selu US$ 5.
Nia esplika, agora sei halo jestaun husi BNCTL no sei prosesu hela, depois remata mak foin fo sai, sei halo lansamentu ida atu publiku mos bele hatene katak hahu selu.
Kuandu implementa ona signifika katak, tarata dokumentus neebe ligasaun ho Notariadu tenke selu hotu, maibe atu legaliza no halo tradusaun sira nee la too ba iha valor US$ 5 ida, sei iha valor USA$ 2 ka 3.
Iha fatin ketak, Komunidade Zacarias dos Santos dehan, hadia uluk sistema atendimentu mak foin anunsia kona-ba selu, atu komunidade sira selu ona tenke atende sira ho diak.
“Hadia ona sistema atendimentu, atu komunidade sira selu karik bele atende diak liu,” dehan nia.
Nia argumenta, ohin loron atendimentu balu sei lao lento, tanba nee se planu deside selu, hadia mos sistema atendimentu ho lais.
(ter)
