DILI, STLTIMORLESTE.com – Bolseiru Timoroan nain rua (2) neebe durante nee apoiu husi Governu Indonezia liu husi Programa Beasiswa Kemitraan Negara Berkembang (KNB) remata ona sira nia estudu iha mestradu iha Universitas Atma Jaya Yogyakarta.
Iha biban nee Bolseiru Caitano Jose Freitas ba jornalista STL, kuarta nee (04/03/2026) hatete, remata estudu mestradu nee laos preveleiju maibe responsabilidade.
“A educação não é apenas um privilégio, mas uma responsabilidade diante da sociedade. Edukasaun laos privilejiu ida, maibe responsabilidade ida. Saida mak hau hakarak hatete mak laos ema hotu-hotu iha oportunidade atu tuir ensinu superior. Tanba nee, bainhira ita hetan oportunidade hanesan nee, ida nee lori ho nia konfiansa ida. Matenek neebe ita hetan labele para deit iha realizasaun pesoal, maibe tenke realiza iha kontribuisaun real sira ba sosiedade no nasaun. Ba hau, edukasaun nuudar prezente ida neebe lori mos responsabilidade moral atu fo benefísiu,” dehan Bolseiru Caitano.
Bolseiru Caitano dehan, Timoroan nain 5 mak hetan apoiu husi Governu Indonezia liu husi Programa Beasiswa Kemitraan Negara Berkembang (KNB), maibe nain 2 mak remata ona nain tolu seidauk remata.
“Bainhira hau remata estudu eestradu, hau sente mistura entre kontente no responsabilidade boot. Kontente tanba prosesu nee la fasil, iha tempu balu hau hasoru difikuldade no prova barak. Maibe iha tempu hanesan, hau sente katak ida nee laos deit susesu pesoal, maibe responsabilidade atu fo kontribuisaun ba Timor-Leste. Graduasaun nee laos pontu final, maibe hahu etapa foun atu servi no fo kontribuisaun ba nasaun,” katak Caitano.
Iha biban nee nia mos hatoo agradese ba Governu Indonezia liu husi Programa Beasiswa KNB neebe durante nee apoiu ona sira hodi halao estudu iha Universitas Atma Jaya Yogyakarta.
“Sim, hau hakarak hatoo hau nia agradesimentu ba Governu Indonezia liu husi Programa Beasiswa KNB, neebe fasilita hau atu kontinua estudu iha Universitas Atma Jaya Yogyakarta. Apoiu nee laos deit finansial, maibe mos forma konfiansa no oportunidade atu dezenvolve kapasidade. Hau mos hakarak hatoo agradesimentu ba Governu Timor Leste neebe kontinua enkoraja juventude atu kontinua eskola no aprende iha nivel aas,” dehan nia.
Nia hatutan, nuudar mos funsionariu publiku neebe durante nee haknaar aan iha UNTL hatoo mos agradese ba CFP neebe fo ona lisensa ba nia hodi halao estudu.
“Nuudar Funsionariu Publiku, hau hakarak hatoo agradesimentu ba Comissao Funcao Publica (CFP) Timor Leste neebe fo ona lisensa mai hau durante estudu,” katak nia.
Nia konta katak prosesu estudu laos fasil. Iha adaptasaun kultura no lingua, liu-liu bainhira nia hahu ho programa BIPA (Bahasa Indonesia bagi Penutur Asing) durante tinan ida. Durante prosesu nee, hasoru prova pesoal neebe la fasil.
“Maibe situasaun sira nee hanorin hau atu forte liu tan no la para iha dalan. Iha tempu balu hau hasoru stres akademiku, revizaun repetidu, no presiza trabalha ho disiplina aas. Maibe prosesu nee hanorin hau kona-ba persistensia, integridade no responsabilidade. Hau aprende katak edukasaun laos deit kona-ba intelijensia, maibe mos kona-ba karakter,” konta nia istoria.
Nia haktuir tan katak iha Universitas Atma Jaya Yogyakarta (UAJY), iha Timoroan balu neebe kontinua estudu iha nivel diferente, maibe sira neebe simu bolsa estudu KNB angkatan 2023 nee hamutuk nain lima (5).
“Ami hahu estudu iha tinan 2024 no remata iha tinan 2026. Durante estudu, dezafiu boot sira mak adaptasaun kultura, lingua, no presiza mantein konsistensia iha peskiza no publikasaun. Maibe ho apoiu dosen, familia no kolega sira, hau bele ultrapasa prosesu nee ho diak. Ami nain rua mak gradua ona no kolega nain tolu seluk sei iha prosesu peskiza no hakerek teze,” katak nia.
Bolseiru nain rua neebe mak remata ona mestradu mak hanesan Caetano Jose Freitas, B.CC., l.Eng Civ., M.T nomos Firmino Fitrino Ximenes L.Eng.Civ., M.T.
(eme)
