BAUKAU, STLTIMORLESTE.com – Projetu konstrusaun refetori no dapur ba programa merenda eskolar iha Munisipiu Baukau seidauk implementa.
Diretor Servisu Munisipal Edukasaun Baukau, Afonso dos Santos da Costa hateten, tinan nee Servisu Munisipal Edukasaun Baukau liu husi PNDS Baukau sei konstrui refetori no dapur ba programa merenda eskolar iha eskola sira neebe identifikadu ona, maibe projetu refere seidauk implementa, tanba sei faze preparasaun husi PNDS Munisipiu Baukau.
“Sira sei prepara, dezenhu iha hotu ona sei hein prepara tenderizasaun husi PNDS,” Diretor Servisu Munisipal Edukasaun Baukau, Afonso dos Santos da Costa hateten ba STL iha nia knaar fatin Vila Nova Baukau, Kurta (04/03/2026).
Nia sublina, dezenhu ba konstrusaun refetori no dapur merenda eskolar parte tekniku husi PNDS Baukau konklui ona no Servisu Munisipal Edukasaun Baukau halo ona komfirmasaun ho diretor PNDS Munisipiu Baukau atu aselera prosesu tenderizasaun, maibe sei prepara prosesu Administrasaun balu neebe prezisa kompleta molok ba faze tenderizasaun.
Nia garante, projetu konstrusaun refetori no dapur ba merenda eskolar iha Munisipiu Baukau tinan 2026 mezmu too ona fulan Marsu seidauk implementa, maibe garante sei implementa, tanba orsamentu ba projetu refere husi Orsamentu Jeral Estadu (OJE) 2026 neebe tenke ezekuta iha tinan nee.
Tanba nee husu Programa Nasional Dezenvimentu Suku Baukau, atu aselera prosesu sira hodi implementa projetu refere ho durasaun tempu sedu.
Hatan ba kestaun nee, Diretor Programa Nasional Dezenvimentu Suku (PNDS) Munisipiu Baukau, Amaro esplika, projetu konstrusaun refetori no dapur ba programa merenda eskolar iha Munisipiu Baukau seidauk implementa, tanba foin iha faze levantamentu dadus no survey ba fatin konstrusaun sira, maibe sei hein mos asina akordu husi Suku ba projetu refere.
“Dokumentus sira ami prepara hotu ona hela Suku balu mak seidauk mai asina, maibe kompleta tiha ita sei lori ba Prezidente Autoridade halo aprovasaun tama iha fim de Marsu ou inisiu Abril ita bele implementa dadauk ona ba iha projetu tomak inklui mos dapur merenda eskolar ho refetori nee,” Amaro promete
Projetu konstrusaun refetori no dapur ba programa merenda eskolar neebe atu konstrui iha nivel eskola identifikadu sira iha Munisipiu Baukau, tuir planu sei konstrui iha eskola hitu (7) mak hanesan EBF Triloka no Bukoli iha Postu Baukau Vila, EBC Soba Postu Laga, EBC Vemasi Tasi Postu Vemasi, EBC Maluru Postu Matebian, EBC Bahamori Postu Venilale no EBC Makalaku Postu Kelikai neebe kada projetu iha eskola ida ho alokasaun orsamentu rihun US$ 30.
(tom)
