DILI, STLTIMORLESTE.com – Bolsa kandidatu profesores neebe mak koloka ona ba eskola sira iha Munisípiu Bobonaro hasoru difikuldade ba rezidensia, tanba balun hela ho komunidade no balun aluga uma.
Direitor Servisu Edukasaun Munisípiu Bobonaro, Miguel Freitas hatoo kestaun nee ba jornalista STL, Kinta nee (05/03/2026).
“Dezafiu seluk mak ami hatoo ona liu husi vizitasaun Parlamentu Nasional ninia, liu-liu ba rezidensia ba profesores bolsa kandidatu sira nee, tanba balun hela hamutuk ho ita nian komunidade sira, maibe sira aluga, nee mak bolsa kandidatu profesores sira hasoru dezafiu. Nee mak tuir planu ami nian no bainhira mak atu implementa buat nee, ami fahe tiha ona iha 33 rezidensia ba iha Munisipiu Bobonaro, ami fahe hotu ona ba eskola, maibe la hatene ninia realizasaun nee bainhira, ami hein deit,” dehan sublina.
Nia dehan, bolsa kandidatu profesores sira nee aluga deit uma, tanba nee husi Edukasaun Munisípiu nafatin identifika profesores sira neebe mak hasoru dezafiu ba sira nian hela fatin, tanba nee oinsa mak prepara rezidensia ba sira hodi bele fasilita sira nian hela fatin, atu nunee bele hanorin estudantes sira iha eskola.
“Ita nian bolsa kandidatu profesores sira neebe mak aluga uma nee husi nivel ensinu baziku ninia, tanba bolsa kandidatu ba pre eskolar nee foin koloka mai iha tinan 2025,” nia informa.
Iha fatin seluk, Diretor Servisu Edukasaun Munisípiu Ainaro, Patricio da Costa Magno hatete, profesores bolsa kandidatu sira nee balun komunidade oferese fatin ba sira no balun mak tenke aluga komunidade sira nia uma.
“Ita nian profesores bolsa kandidatu sira nee balun komunidade oferese fatin ba sira no balun mak tenke aluga komunidade sira nia uma, tanba ita seidauk iha rezidensia ba ita nian profesor sira, tanba nee sira balun tenke aluga uma no balun mak komunidade oferese fatin ba sira,” katak nia.
(jac)
