DILI, STLTIMORLESTE.com – Prezidente Republika (PR), Jose Ramos Horta hatete, funu iha Mediu Oriente entre Israel, Amerika ho Iraun sei fo impaktu ba Timor Leste, tanba ekonomia iha mundu susar.
Prezidente Republika Jose Ramos Horta hatoo kestaun nee ba jornalista sira, bainhira remata fo tomada de pose ba Vise Ministra Negosiu Estranjeiru no Kooperasaun (MNEK), Sejuina Maria Gomes iha Palasiu Prezidensial Nicolau Lobato, Bairo Pite, Kinta (05/03/2026).
PR esplika, funu iha Mediu Orienta sei iha impaktu ba Timor Leste.
“Impkatu iha tanba ekonomia iha mundu nee araska los, ita boot sira lembra uluk fos kaut 25 kilo folin US$ 11, hau hatene folin sira nee tanba hau sempre sosa ba apa ama sira iha bairu sira nee hau mak sosa,” dehan Prezidente Republika.
Xefe Estadu dehan, antes nee prezidente tula ama ida iha Bekora baibain faan banibeen besik Pateo neeba, prezidente tula ama nee ba iha Bekora iha loja ida iha sorin hodi sosa foos husu fos 25 kilo folin US$ 11, mina tein Bimoli 5 litru ho folin US$ 5, uluk folin baratu maibe tanba ho Guera Ukrania foos 25 kilo folin sae kedas ba US$ 20, mina folin sae makaas iha mundu tomak.
Indonezia rasik mak produs mina mos folin sae makaas, nee impkatu makaas mos ba Timor Leste.
“Agora Israel, Amerika ho Iraun, Iraun Blokeia Petroliu mina lubuk ida liu, buat sira nee hotu impaktu boot ba mundu tomak, maibe Governu hatene tenta para labele impaktu boot liu ba povu ba sira neebe kiik no kiak,” dehan PR Horta.
Tuir Prezidente, mekanizmu saida mak Governu presiza halo atu antisipa ba situasaun ida nee? hatan ba kestaun nee Prezidente Republika hatete, mekanizmu uniku neebe mak iha mak momentu too karik hasai osan espesial husi fundu soberanu para tane importasaun hahan para labele todan liu.
“Nee uniku mekanizmu ita la konsege trava krize nee, se dolar monu, ou dolar bele monu ba funu nee entaun ita pior liu tan, buat neebe ita sosa signifika karun liu,” katak nia.
Prezidente Republika hatete, laiha rai ida bele eskapa hetan kunsikuensia Guera nee hotu-hotu inklui Timor mos sei hetan, no haree took semana sira mai nee.
Xefe Estadu hatete, se ho funu nee halo osan dolar monu entaun Timor sei hasoru krize, tanba sasan hotu sei karun liu tan.
(eme)
