BAUKAU, STLTIMORLESTE.com – Servisu Munisipal Edukasaun Baukau halo ona preparasaun ba implementasaun projetu konstrusaun edifisiu pre-eskolar hamutuk unidade 10 resin iha Munisipiu Baukau.
Diretor Servisu Munisipal Edukasaun Baukau, Afonso dos Santos da Costa esplika, projetu konstrusaun ba pre-eskolar neebe atu implementa iha Munisipiu Baukau, apoiu fundus husi parseiru dezenvolvimentu Koica neebe daudaun halo ona preparasaun ba dezenhu inklui mos halao levantamentu dadus ba rai kontinua lao iha terrenu neebe involve husi entidades oin oin.
“Preparasaun sira nee ita hamutuk parseiru, ekipa nasional, munisipal inklui ita nia enjineiru destakadu mai iha nee foti hotu ona dadus, kuandu konklui ona bele implementa,” Diretor Servisu Munisipal Edukasaun Baukau, Afonso dos Santos da Costa hateten ba STL iha nia knaar fatin Vila Nova Baukau, Sesta (06/03/2026).
Nia informa, projetu konstrusaun ba pre-eskolar Baukau hetan unidade 10 resin, neebe ba fatin konstrusaun hanesan iha Suku Bukoli konklui ona, tanba Autoridade Suku ofisialmente entrega ona rai ba Ministeriu Edukasaun atu utiliza ba konstrusaun, nunee mos iha suku seluk balu konklui ona no balu seidauk.
Maibe ekipa nafatin esforsu liu husi koordenasaun Autoridade Suku sira hodi konklui lalais dadus sira liu-liu rai nian, nunee bele hahu ona ba faze implementasaun projetu iha terenu, tanba projetu konstrusaun ba pre-eskolar unidade 10 resin refere konsidera nuudar orgulhu ida ba Munisipiu Baukau neebe tenke implementa iha tinan nee hodi ajuda labarik sira asesu edukasaun hahu husi pre-eskolar.
“Projetu 10 resin nee laos etapa por etapa hanesan 4 ou 5 uluk too tinan 5 mak mosu tan mais agora nee Baukau hetan 10 resin iha tinan ida nee bele ajuda ona ita nia setor edukasaun tanba iha konstrusaun,” Afonso komenta.
Entretantu projetu konstrusaun ba edifisiu pre-eskolar unidade 10 resin iha Munisipiu Baukau nee apoiu husi Governu Korea liu husi KOICA no implementa husi UNICEF ba durasaun tinan 5, ho nia objetivu atu halao programa infansia ba labarik idade 03 too 05 husi Munisipiu Baukau no Bobonaro.
Projetu konstrusaun nee ba edifisiu pre-eskolar nee hamutuk 29, neebe 15 implementa iha Baukau no 14 Munisipiu Bobonaro ho valor orsamentu milhaun US$ 6, neebe iha Munisipiu Baukau tuir planu atu implementa iha Suku Bukoli, Kaibada Makasae, Nunira, Saelari, Uakala, Libagua, Betumutu, Gurusa, Letemumu, Lelalai, Laisorulai de Baixo no Maluru.
(tom)
