BAUKAU, STLTIMORLESTE.com – Durante anin boot neebe akontese iha semana nee, Servisu Munisipal Edukasaun Baukau rejistu eskola ida hetan estragus.
Diretor Servisu Munisipal Edukasaun Baukau, Afonso dos Santos da Costa informa, relasiona udan no anin neebe ho intensivu makaas iha semana nee, Servisu Edukasaun Munisipal simu ona karta husi Koordenador Eskola EBF Asanunu, Suku Soba, Postu Administrativu Laga, neebe aprezenta ho fotografia eskola refere hetan estragus.
“Eskola Asanunu mak nia karta mai ona dehan eskola anin estragus, mais ami sei haruka tekniku sira ba haree, mais eskola seluk seidauk iha informasaun” Diretor Servisu Munisipal Edukasaun Baukau, Afonso dos Santos da Costa hateten ba STL iha nia knaar fatin Vila Nova Baukau, Sesta (06/03/2026).
Nia sublina, mezmu karta husi eskola refere too ona iha Servisu Munisipal nia liman, maibe seidauk hatene kategoria estragus, tanba nee sei orienta ekipa ida ba eskola refere halo identifikasaun nunee bele hatene kondisaun eskola hodi submete ba nasional.
Tuir previzaun tempu katak, udan no anin sei kontinua akontese, tanba nee husu inan aman sira kuidadu no atensaun akompanha oan sira ba eskola.
(tom)
