DILI, STLTIMORLESTE.com – Ministra Edukasaun deklara katak, feto potensial barak mak asumi ona kargu iha Ministeriu Edukasaun (ME), tanba numeru kontinua iha mudansa.
“Tuir informasaun antes nee feto neebe asumi kargu iha ME 7% too iha tinan 2023, maibe iha tinan rua nia laran ita konsege hasai ba too 21%, hau fiar katak iha loron hira tan sei iha feto barak mak asumi kargu hanesan koordenadora ba edukasaun pre eskolar, numeru nee bele sae ba too 25% ka 26%,” dehan Ministra Edukasaun, Dulce de Jesus Soares ba jornalista sira iha Timor Plaza, bainhira partisipa iha Konferensa Nasional Lider Feto iha Edukasaun, Sabadu (07/03/2026).
Nia dehan, alvu ida neebe dehan katak feto atu kaer pozisaun too iha 30%, fiar katak iha tinan 2028 bele atinji ona persentajen ida nee no bele liu tan.
Iha fatin ketak, Akademiku Sebastião dos Santos dehan, realidade hatudu katak ohin loron feto barak mak asumi kargu, nee hatudu katak iha ona mudansa.
“Fo tempu mos ba inan feto sira lidera, kuandu sira iha kapasidade neebe diak, atu nunee bele lori edukasaun lao ba oin,” dehan nia.
Nia enkoraja, inan sira neebe iha kapasidade labele taka aan, maibe hatudu matenek neebe iha atu fahe hanoin sira hodi dezenvolve Edukasaun liu husi matenek sira nee.
(ter)
