DILI, STLTIMORLESTE.com – Estudantes husi Eskola Sekundariu Nobel da Paz balun dader ba eskola maibe la tuir aula, hamriik deit iha estrada, tanba nee husi parte eskola fo sala ba inan aman.
Haktuir Diretor Eskola Sekundariu Nobel da Paz, Jeremias P. de Jesus ba jornalista STL, Segunda nee (09/03/2026).
“Hau sempre fo hatene ba parte seguransa katak, bainhira aula lao hela estudantes neebe mak sei iha liur, uza tan farda eskola nian, tanba saida la tama iha aula para hetan siensia husi profesores sira, nunee remata estudu bele hetan diploma, agora mai eskola la tama aula nee inan aman mak sala. Hau hatete beibeik nunee, uza farda eskola nian sai husi uma mai iha eskola, maibe too mai la tama aula, hamriik deit iha estrada boot nee ba lakohi partisipa iha aprendizajen,” dehan nia.
Tuir Jeremias katak, nuudar estudantes nee dader sai husi uma mai eskola nee tenke tuir aula, agora mai la tama aula, hamriik iha liur nee ba fuma fali sigaru, hemu tua, depois halo tun sae fali iha estrada nee ba, ida nee inan aman mak ladun hanorin ninia oan sira, tanba durante nee husi eskola fo tiha ona deklarasaun katak, mai eskola nee tuir aula, laos ba hamriik fali iha estrada nee ba.
(jac)
