DILI, STLTIMORLESTE.com – Eskola rua nolu resin lima (25) neebe mak lokaliza iha Munisípiu Ainaro sei menus sala de aula ba estudantes sira.
Asuntu nee hatoo husi Diretor Servisu Edukasaun Munisípiu Ainaro, Patricio da Costa Magno ba jornalista STL liu husi telefone, Segunda nee (09/03/2026).
“Dezafiu neebe mak ita nian eskola sira enfrenta nee mak ida nee, tanba ita nian eskola barak mak kondisaun eskola nee seidauk sufisiente, tanba balun iha sala tolu deit, balun sei didin ho kalen, nee duni ita nian planu ba PAM no ME. Ita identifika ona ita nian eskola neebe mak menus sala de aula, eskola iha Ainaro hamutuk 25 sei menus sala de aula ba ita nian estudantes sira, inklui ensinu baziku no pre eskolar,” nia esplika.
Nia dehan, eskola 25 nee kompostu husi nivel ensinu baziku no pre eskolar, nee lokaliza iha postu haat nee mak hanesan Ainaro Vila, Hatudu, Fatubliku no Maubesi, total profesores husi pre eskolar, ensinu baziku hamutuk 1010, total ensinu baziku 94 inklui eskola kafe, tekvo 3, sekundariu 6, nee inklui ho katolik, total estudantes ensinu baziku diza 18.000.
Nunee mos superintendente Edukasaun Munisipiu Dili, Cesarina C. Guterres dehan, eskola balun mak presiza atu aumenta sala de aula ba estudantes sira no balun ninia kondisaun seidauk diak, presiza halo konstruksaun foun no balun tama ba realibitasaun ninia.
“Hau hanoin ita nian eskola balun mak presiza atu aumenta sala de aula ba estudantes sira no balun ninia kondisaun seidauk diak, presiza halo konstrusaun foun no balun tama ba realibitasaun ninia,” nia dehan.
Entretantu Diretor Nasional Ensinu Sekundariu iha ME, Benjamin Gomes da Cruz Fernandes dehan, kondisaun eskola balun seidauk diak, balun sei menus sala aprendizajen ba estudantes sira.
“Ita nian kondisaun eskola balun seidauk diak, balun sei menus sala aprendizajen ba estudantes sira,” nia dehan.
(jac)
