KOVALIMA, STLTIMORLESTE.com – Estudante sira neebe remata ona estudu iha eskola Esninu Baziku terseiru siklu iha Suku Taroman, Postu Administrativu Fatuliluk, Munisipiu Kovalima, labele kontinua sira nia estudu iha ensinu sekundaria, tanba lao distansia dook.
Deklarasaun nee hatoo husi Xefe Suku Taroman, Leo Lelasa ba jornalista STL iha resintu edifisiu Administrasaun Munisipal Kovalima, Kuarta (11/03/2026).
“Kauza husi estudante sira remata EBC atu kontinua fali iha sekundaria tanba dook husi Postu Fatuliluk ba asesu fali Edukasaun iha Kovalima dook tebes, entuan inan aman hapara sira nia oan, maibe nuudar umanu forma uma kain,” dehan Leo.
Nia argumenta, razaun estudante sira neebe idade sei kiik iha direitu atu kontinua asesu edukasaun, maibe iha Suku Taroman laiha edifisiu eskola ensinu sekundaria no bainhira sira termina estudu iha eskola nivel EBC hakarak atu kontinua sira nia estudu iha Kovalima, maibe inan aman la hatan, tanba distansia dook no seluk mak ekonomia familia la sufisiente atu aluga uma ba nia oan atu hela hodi eskola, mak foti desizaun hodi hapara oan sira nia estudu.
Nia sublina, liu husi asaun hapara estudante sira nia estudu mak estudante sira foti desizaun forma uma kain ho idade kiik no fo impaktu ba labarik sira afeta ma-nutrisaun.
“Entaun Governu prezisa prepara eskola sekundaria iha Fatuliluk para inan aman neebe vulneravel liu sira nia oan bele asesu ba edukasaun,” Leo akresenta.
Nia informa, estudante neebe husi tinan 2023 too 2025 forma uma kain liu ona 100, tanba nee Governu presiza harii eskola ensinu sekundaria ida iha Suku Taroman, Postu Fatuliluk, nunee bele fo asesu edukasaun ba komunidade vulneravel nia oan hodi limita kaben sedu.
Hatan ba kestaun nee, Ministra Edukasaun, Dulce de Jesus Soares hateten, Ministeriu Edukasaun hamutuk ho Ministeriu Planeamentu Investimentu Estratejiku halo ona levantamentu atu kompleta numeru sala iha Kovalima tuir programa Governu.
“Ita boot sira haree ministeiru kontinua re-organiza Servisu Ministeriu Edukasaun, iha ema barak mak loke klase paralelas, Governu rekursu la too atu lori, se iha neeba labarik 20 ou 30 pesoas Governu tenke koloka 12 profesores ba hanorin 20 ou 30 pesoas, hau hanoin nee uzu rekursu neebe la efetivu, tanba nee ministeiru nafatin haree fatin neeba bele loke eskola filial ga lae,” Ministra Dulce katak.
(tom)
