DILI, STLTIMORLESTE.com – Iha kompetisaun ruma feto ho feto rasik la apoiu malu tanba diferente husi partidu nomos organizasaun neebe sira asumi ba.
Feto Potensial Maria Amaral ba jornalista STL iha nia knaar fatin Kaikoli Kinta nee (12/03/2026) hatete, dala barak ema kestiona katak organizasaun sosiedade sivil no Governu luta makaas oinsa hasae numeru feto iha nivel foti desizaun nomos iha dezenvolvimentu nasional, maibe feto ho feto rasik la fo apoiu ba malu, ida nee buat neebe akontese duni, tanba nee diferente husi partidu nomos organizasaun.
“Ita haree dala ruma feto ida kandidata aan ba xefe suku ka kandidata aan atu sai lideransa iha organizasaun ruma liga ho foti desizaun nia, maske nia iha kapasidade ou skil neebe diak, maibe nia maluk feto rasik la fo apoiu no apoiu fali mane, ida nee impaktu ida, tanba iha partidu neebe la hanesan no organizasaun neebe mak la hanesan, entau feto tenke apoiu mane tanba sira partidu hanesan no halo asaun kontra nia feto maluk tanba partidu ou organizasaun neebe la hanesan,” dehan nia.
Nia hatete, ida nee mos la sai bareira ida hodi satan feto nia involvimentu, tanba ohin loron feto barak iha kapasidade no prontu lidera iha kualker atividade, tanba nee labele tauk maibe ho partidu no organizasaun neebe la hanesan maibe luta ba igualdade sempre hamutuk.
Agradese tanba iha Parlamentu Nasional maske iha derefente partidu maibe koalia kona-ba asuntu igualdade jeneru feto sempre hamutuk, maske iha votasaun ba programa ruma sempre kontra malu.
Nunee mos Diretor Jeral SEI, Armando da Costa hatete, dala barak feto potensial balun atu kandidata aan maibe la apoiu husi nia maluk feto ida tanba iha sirkuntansia barak.
DJ dehan, se iha kandidata feto potensial karik enkoraja feto apoiu feto maibe iha sirkuntansia barak halo ema ida atu deside nia apoiu ba kandidatura ka lideransa feto ida.
Diretor Jeral dehan, dala ruma feto ho feto la apoiu tanba inklina aan iha organizasaun oin oin neebe lahanesan no involve iha partidu politiku neebe lahanesan no grupu neebe la hanesan.
“Feto la apoiu malu tanba inklina aan iha partidu neebe lahanesan grupu neebe lahanesan entau mai ho hanoin entre opsaun pesoal atu apoiu ema ruma karik ho orientasaun grupu ninia orientasaun organizasaun neebe nia partisipa ba entau ida nee mos iha komitmentu bai ta nia organizasaun nunee mos karik ita nia komitmentu pesoal ba assuntu nasional ba assuntu jeral ida neebe ema dehan ita hotu mai fo lesuk apoiu ba lideransa feto sira,” dehan Doretor Jeral SEI.
(eme)
