DILI, STLTIMORLESTE.com – Prezidente Republika (PR), Jose Ramos Horta enkoraja funsionariu no diplomata TL iha Lisboa Portugal halao knaar ho responsablidade no profisionalizmu.
Prezidente Republika Jose Ramos Horta hatoo kestaun nee bainhira vizita ofisial ida ba Embaixada Timor Leste iha Lisboa, lokaliza iha Belem, iha ambitu husi ninia ajenda ofisial iha Portugal.
Prezidente Republika, Ramos Horta hasoru malu ho funsionariu no Diplimata hafoin partisipa ofisialmente serimonia tomada de pose Prezidente eleitu foun ba dala 21 Portugal nian, Antonio Jose Seguro, neebe troka Marcelo Rebelo de Sousa.
Tuir Komunikadu neebe STL asesu husi Media PR Kinta (12/03/2026) hatete, bainhira hasoru malu ho Funsionariu no diplomata Iha observasaun final, Prezidente enkoraja Embaixador no funsionariu diplomatiku sira atu kontinua halao sira-nia knaar ho dedikasaun, responsabilidade no profisionalizmu.
Prezidente Ramos Horta akompanha husi Ministru Negosius Estranjeirus no Kooperasaun, Bendito dos Santos Freitas, no simu husi Xefe Misaun Diplomatika Timor Leste nian iha Portugal, Embaixador Manuel Antonio Aroujo Serrano, hamutuk ho diplomata no funsionariu sira seluk embaixada nian.
Durante vizita nee, Xefe Estadu hasoru malu ho ekipa diplomatika sira atu hatene besik liutan kona-ba funsionamentu misaun loroloron nian, avalia atividade sira neebe lao hela, no diskute dezafiu pratiku sira neebe misaun nee hasoru. Iha observasaun final, Prezidente enkoraja Embaixador no funsionariu diplomatiku sira atu kontinua halao sira-nia knaar ho dedikasaun, responsabilidade no profisionalizmu.
Xefe Estadu destaka mos papel importante neebe embaixada iha hodi defende interese nasional Timor Leste nian iha rai liur no atu kontinua hametin ligasaun amizade neebe klean no kooperasaun bilateral entre Timor Leste no Portugal.
(eme)
