DILI, STLTIMORLESTE.com – Relasiona ho menus kampu trabalhu iha rai laran, mak graduadus neebe remata estudu iha universidade partisipa iha formasaun lian inglês, hodi aumenta konhesimentu ba lian refere.
Albino da Costa Moniz hanesan graduadu husi UNPAZ, Fakuldade Ekonomia, Departamentu Jestaun hatete, foin remata ninia estudu iha fulan dezembru tinan kotuk, maibe too agora seidauk hetan servisu, maske konkore ona vaga balun too agora seidauk iha informasaun, nunee partisipa fali iha formasaun lian inglês durante fulan tolu nia laran.
“Hau remata hau nian estudu tinan kotuk iha UNPAZ, hau hatama ona vaga iha NGO balun maibe too agora seidauk hetan kontaktu, tanba nee hau partisipa fali iha formasaun ba lingua ninia, nee mos importante bele aumenta hau nian konhesimentu, tanba seidauk hetan servisu,” dehan Albino ba STL, Kinta nee (12/03/2026).
Tanba tuir Albino katak, vaga neebe loke nee limitadu, depois ema barak mak konkore, nee duni depende ba sorti deit, nee duni partisipa formasaun nee mos importante tebes, tanba nee ba lingua ninia, aleinde lingua sei partisipa formasaun ba komputador ninia.
“Hau foin partisipa formasaun iha fulan ida nee, formasaun ba lingua inglês tuir durante fulan tolu nia laran, karik instituisaun ruma fo sai vaga, naran ba Koko took, tanba buat hotu depende ba ita nian sorti deit,” nia komenta.
Nunee mos Adriano Guterres nudar graduadu husi UNPAZ, Fakuldade Ekonomia hatete, bainhira graduadu hotu iha dezembru 2025, hahu iha fulan Janeiru tinan nee nia rasik loke kios, tanba labele hein deit servisu, maibe oinsa mak halo negosiu para bele hetan osan, tanba vaga loke oituan deit no presiza ema pituan deit, diak liu halo negosiu hodi hein vaga neebe fo sai.
“Bainhira hau graduadu hotu iha Dezembru 2025, hahu iha fulan Janeiru tinan nee hau rasik loke kios, tanba labele hein deit servisu, maibe oinsa mak halo negosiu para bele hetan osan, tanba loke vaga oituan deit no presiza ema oituan deit, diak liu halo negosiu hodi hein vaga neebe fo sai,” nia deklara.
(jac)
