DILI, STLTIMORLESTE.com – Atu evita susuk iha tempu udan, komunidade idak-idak iha konsiensia, tenke tau lixu iha fatin neebe mak prepara ona.
Informasaun nee hatoo husi Rosito Maia da Cruz hanesan komunidade husi Suku Bairo Pite ba STL, Kinta nee (12/03/2026).
“Tempu udan nunee ita atu evita susuk nee, ita komunidade idak-idak mak tenke halo limpeza no tau lixu iha fatin, oinsa kada loron halo limpeza iha valeta neebe besik ita nomos hamoos ita nian uma hun rasik, tanba daudaun moras dengue nee lao hela, tanba moras refere liu husi susuk neebe tata, nunee atu prevene moras ida nee tenke halo limpeza,” dehan nia.
Rosito akresenta, atu prevene aan husi moras dengue mak labele soe lixu arbiru, maibe presiza tau iha fatin atu nunee evita susuk, bazu aifuan, evita bee nalihun iha uma hun, tenke troka bee iha tanki.
“Hau hanoin moras dengue nee liu husi susuk neebe tata, liu-liu komunidade hirak neebe hela besik valeta, oinsa kada loron ou semana hamoos valeta atu nunee evita susuk iha tempu udan,” nia deklara.
Nia dehan, dala ruma komunidade balun laiha konsiensia katak, ema balun halo limpeza ona iha valeta, maibe balun soe tutan fali lixu nee ba iha valeta, ida nee laiha konsiensia ida, lo-loos ema hotu presiza iha konsiensia deit.
(jac)
