DILI, STLTIMORLESTE.com – Ensinu Superior nafatin esforsu aan atu bele aposta ba iha kualidade no labele lakon ho nasaun seluk neebe pertense ba membru ASEAN ninia.
“Atu aposta ba iha kualidade iha ensinu superior, nee mak husi MESSK nafatin fo apoiu ba ita nian universidade sira, ami sei esforsu aan nafatin atu bele aposta ba iha kualidade, nee mak liu-liu ba iha lingua português, tanba agora ita adere ona ba iha ASEAN, tanba nee ami hakarak haree liu ba kualidade, ho nunee ita labele lakon ho nasaun seluk neebe pertense iha ASEAN ninia,” dehan Reitor Instituto Ciensia Saude (ICS), Leao Borges ba jornalista STL iha nia knaar fatin ICS Balide, Dili, Segunda nee (16/03/2026).
Tuir nia, nee duni universidade sira iha rai laran halo esforsu para bele hadia kualidade, oinsa fo kapasitasaun nafatin ba ninia dosentes sira, ho nunee bele prepara rekursu neebe diak ba iha futuru.
“Tanba nee governu liu husi MESSK fo apoiu nafatin ba ita nian universidade sira iha rai laran, atu nunee bele hadia kualidade iha ensinu superior, nee mak hanesan fo kapasitasaun ba dosentes sira lingua português ninia,” nia komenta.
Entretantu Reitor East Timor Coffee Institute ( ETCI), Mateus Maia de Jesus dehan, ensinu superior sira hakarak ka lakohi presiza aposta ba kualidade, tanba jestaun kada instituisaun husi ensinu superior idak-idak tenke kompete ho universidade husi rai liur.
“Ita nafatin aposta ba kualidade iha ita nian ensinu superior sira iha rai laran, tanba ita tama ona ba iha ASEAN, nee atu kompete ou la kompete, nee jestaun husi kada instituisaun idak-idak nian atu kompete iha universidade sira husi rai liur, tanba nee tama ona iha ASEAN, nee duni hakarak ka lakohi tenke kompete, nee kestaun idak-idak nian,” nia informa.
(jac)
