DILI, STLTIMORLESTE.com – Feto nian partisipasaun iha ensinu superior, liu-liu iha instituto Ciência Saude (ICS) partisipa masimu, tanba numeru estudantes feto mak barak liu mane.
Lia hirak nee hatoo husi Reitor Instituto Ciensia Saude (ICS), Leao Borges ba STL iha nia knar fatin ICS, Tersa nee (17/03/2026).
“Hau hanoin partisipasaun estudantes feto sira nian iha nivel ensinu superior, liu-liu iha ami nian instituto rasik masimu tebes, tanba ita kompara ho mane no feto nee kuaze feto mak barak liu. Nee duni feto nian partisipasaun nee boot tebes, tanba nee nuudar Reitor nafatin enkoraja estudantes feto sira nee katak, nafatin buka atu aprende diak liu tanba area neebe sira hili iha sira nian estudu,” nia dehan.
Reitor ICS nee akresenta, oinsa estudantes feto sira bele partisipa masimu iha prosesu ensinu aprendizajen, tanba nee husu sira uza oportunidade neebe diak para aprende diak liu tan, kona-ba sira nian valoriza iha prosesu estudu, nee depende ba ema idak-idak nian esforsu neebe sira halo, liu husi esforsu aan estuda.
“Feto sira asesu edukasaun mai too iha ensinu superior, tanba sira mos hakarak aprende no hili area estudu neebe mak importante, maibe iha ami nian instituto nee haree liu ba iha area saude ninia,” nia esplika.
Entretantu Joana da Costa Maia hanesan estudante husi departamentu parteira dehan, nia foin tama iha ICS no hili area parteira ninia, foin remata estudu sekundariu iha tinan kotuk no agora daudaun kontinua estudu iha ICS, asesu edukasaun nee direitu ema hotu nian, tantu feto ka mane, depende husi família idak-idak nian suporta ba oan nian estudu.
“Hau foin tama iha ICS no hili area parteira ninia, foin remata estudu sekundariu iha tinan kotuk no agora daudaun kontinua estudu iha ICS, asesu edukasaun nee direitu ema hotu nian, tantu feto ka mane, depende husi família idak-idak nian suporta ba oan nian estudu,” nia informa.
(jac)
