DILI, STLTIMORLESTE.com – Prezidente Republika (PR), Jose Ramos Horta nomeia Henriqueta Maria da Silva nuudar Xefe Kaza Sivil foun ba Prezidensia no Graziela Fatima Liu Soares nuudar Adjunta Xefe Kaza Sivil.
Iha loron Tersa (17/03/2026) Prezidensia Republika fo sai nomeasaun ba Xefe Kaza Sivil no Adjunta Xefe Kaza Sivil foun, hodi reforsa ninia kompromisu ba governasaun neebe efetivu no dezenvolvimentu estratejiku.
Prezidente nomeia Henriqueta Maria da Silva nuudar Xefe Kaza Sivil foun ba Prezidensia, neebe formaliza liu husi Dekretu Prezidente Republika Nu. 32/2026. Iha tempu hanesan, Graziela Fatima Liu Soares, hetan ona nomeasaun nuudar Adjunta Xefe Kaza Sivil foun, tuir Dekretu Prezidente Republika Nu. 33/2026.
Henriqueta Maria da Silva lori esperiensia liu dekada rua iha dezenvolvimentu no governasaun ba nia knaar foun. Nuudar Profisional ida neebe iha esperiensia iha dezenvolvimentu institusional no jestaun programa, nia serbisu nuudar Adjunta Xefe Kaza Sivil iha Prezidensia.
Ninia kareira distinta inklui knaar sira asesoria senior nian ba Governu kona-ba reforma no responsabilizasaun setor publiku nian jere programa governasaun lokal ho eskala boot ba UNDP/UNCDF koordena peskiza kona-ba jeneru no dezenvolvimentu ba UNIFEM no servisu hanesan konsultor nasional ba Banku Mundial, WFP, no UNDP. Ninia matenek kobre siklu projetu tomak, hosi dezenu polítika no planeamentu estratejiku too implementasaun, monitorizasaun, no avaliasaun.
Henriqueta lidera ona inisiativa multi-setoriais lubuk ida, fasilita ona fortalesimentu institusional ba orgaun estadu, no halao ona peskiza estensivu iha kampu kona-ba dezenvolvimentu ekonomiku no kestaun jeneru. Konesidu nuudar líder orientadu ba rezultadu, nia kombina pratika rezolusaun problema ho kompromisu klean ba kapasitasaun no serbisu iha ekipa. Nia iha Mestradu iha Jestaun Dezenvolvimentu hosi Institutu Jestaun Aziatiku (Filipinas) no Lisensiatura iha Ekonomia hosi Universidade Soegijapranata (Indonezia). Ninia abilidade teknika inklui profisiensia iha analize dadus SPSS, no nia hatene lian Tetum, Indonezia, Ingles, no Portuges.
Graziela Fatima Liu Soares asumi knaar nuudar Adjunta da Chefe da Casa Civil, no atualmente halao knaar nuudar Sekretaria Ezekutiva ba Prezidente dezde fulan Maiu 2022, iha neebe nia hatudu lideransa organizasional esepsional no perísia interkultural.
Ninia kareira abranje knaar sira iha governu nivel aas, inklui Xefi Gabinete iha Sekretaria Estadu Formasaun Profisional no Empregu no Assessora Relasaun Publika ba China Harbor Timor. Esperiensia hirak-nee fornese ba nia esperiensia klean iha lideransa organizasional, administrasaun, relasaun publika, no supervizaun projetu. Graduadu iha Komersiu no Negosius Internasionais hosi Universidade Konkuk iha Koreia-Sul, Graziela mos serbisu ona nuudar Sekretaria Korporativa, instrutora lian Koreana, no Apoiador /Interprete ba Traballador Estranjeiru sira iha Seoul, hodi hadia nia abilidade linguístika no fluensia interkultural. Konesidu ba nia adaptabilidade no abilidade interpersonal neebe diak, nia iha sertifikasaun sira inklui Mini-MBA no Programa Governasaun Global. Nia iha paixaun atu liga ho ema sira hosi orijen oioin no kontribui ba ambiente sira neebe dinamiku no dezafiante.
Prezidente sublina importansia hosi nomeasaun sira-nee ba serbisu kontinuasaun Prezidensia nian atu harii nasaun ida neebe serbí duni ninia povu presiza instituisaun forte neebe lidera husi indivíduu sira neebe iha kapasidade no dedikasaun.
“Hau iha konfiansa tomak katak Sra Henriqueta Maria da Silva no Sra Graziela Fatima Liu Soares, ho sira-nia esperiensia profisional neebe kombinadu no kompromisu metin ba funsaun publika, sei fornese lideransa neebe nesesaria hodi hametin no fo apoiu ba Prezidensia iha ninia misaun atu serbí Timor-Leste tomak,” deklara Prezidente Jose Ramos Horta.
Prezidensia hatoo ninia votus kmanek liu ba nomeada nain rua ba susesu boot liu iha sira nia knaar foun, bainhira sira hahu serbisu importante ida-nee hamutuk.
(eme)
