BAUKAU, STLTIMORLESTE.com – Defisiensia fiziku Armando Belo daudaun idade 60 resin hein hela promesa uma foun husi ukun nain balu iha Aldeia Ossoua, Suku Tirilolo, Postu Administrativu Baukau Vila, Munisipiu Baukau.
Armando Belo ho feen kaben iha uma talin tolu kompostu kiik rua no boot ida, husi uma talin kiik rua, ida utiliza ba armajen neebe daudaun nia rin ida tohar no ida ba dapur, enkuantu uma boot ida neebe sira iha mak sira uza hodi deskansa.
Sira nia uma iha Ossoua la dook husi estrada publiku diresaun husi Waisa ba Areaportu Lanud Baukau. Husi Waisae ba Aeroportu Lanud Baukau too iha area Ossoua bairo Hon-Lubu sira nia uma iha estrada parte liman karuk neebe lutu ho fatuk haleu.
Uma boot neebe sira hela daudaun kondisaun la seguru, tanba uma refere la didin ho piku no material seluk tan neebe seguru hodi satan anin nia malirin husi sira nia deskansa, maibe didin deit ho lona no kalan feruzin balu hodi satan netik anin nia malirin husi sira nia tempu deskansa.
Mezmu uma kondisaun nunee, tanba esforsu masimu husi feen kaben, razaun Xefe familia Armando Belo infreta moras lepra kuaze tinan naruk ona neebe labele halao servisu todan sira.
“Hau nia ferik oan mak sae tali tahan mak halo uma nee, hau sae la diak, tanba hau nia liman ain kukun laiha. Hau moras nee ONU sei iha Timor,” Armando Belo konta ba STL iha uma Ossoua momentu neebe nia feen kaben sei ba bazar faan produtu lokal iha merkadu Vila Nova Baukau.
Husi kondisaun fiziku neebe Armando Belo infrenta mak husu tulun ba Autoridade Suku Tirilolo neebe diriji ona proposta ba Prezidente da Republika (PR) ho numeru REF: 660/Tirilolo-Baukau/VIII/2025, husu atu halo uma foun ba Armando Belo ho nia familia.
Husi rezultadu proposta Suku ba Prezidente da Republika mak mosu ona ekipa ida iha Armando Belo nia fatin sukat rai ho razaun atu halo uma foun, maibe uma refere seidauk mosu tanba seidauk iha fiziku ba konstrusaun neebe hetan husi Armando Belo nia matan.
“Sira haree uma sukat ona rai dehan atu halo uma foun maibe seidauk halo, sira mai hatoo hatoo halo mak seidauk halo,” Armando Belo haktuir promesa husi ekipa PR nian ho triste.
Kondisaun moras nee Armando Belo infreta tinan naruk ona, mezmu labele halo uma diak ida hodi nia ho familia sira hela, maibe Armando Belo la lakon espiritu luta ba kabun hanesan kuda produtu lokal sira hodi sustenta nesesidade loro loron nian, tanba subsidiu idozu nian neebe Estadu Timor-Leste atribui seidauk sifusiente.
“Hau servisu iha toos kuda batar lakeru faan osan mai hola hahan labarik sira,” Armando Belo ho nia beoan nain tolu tur iha uma tatis hodi konta ba STL.
Iha sorin seluk, Xefe Suku Tirilolo, Elvino Belo rekonhese kondisaun neebe daudaun Armando Belo infrenta no hela iha uma kondisaun la favoravel, tanba nee ekipa husi Gabinete Prezidensial da Republika too ona fatin rekolha dadus kona-ba uma hela fatin no kondisaun moras neebe Armando Belo infreta ho razaun atu halo uma ba sidadaun refere, maibe seidauk iha informasaun husi Gabinete Prezidensial da Republika kona-ba konstrusaun uma neebe promete.
“Lideransa komunitaria haree agora daudaun kondisaun neebe la dun favoravel ba nia tanba nee hanesan lideransa komunitaria iha Suku ida nee hakarak informa ba ita nia ekipa neebe mak mai halo levantamentu dadus iha terrenu neeba, se bele karik fo urujentemente ba ita nia komunidade nee, oinsa mak nia bele hetan uma ida neebe mak tahan netik udan no anin,” Elvino katak.
Kondisaun nee, Autoridade Suku Tirilolo nafatin ezije ba ekipa Prezidensial da Republika atu aselera prosesu sira hodi konstrui ona uma ba sidadaun refere.
(tom)
