AMBENO, STLTIMORLESTE.com – Autoridade Protesaun Civil (APC) Rejiaun Administrativa Espesial Oecusse-Ambeno (RAEOA) hamutuk ho ninia ekipa, iha loron Kuarta (18/03/2026), relata progresu servisu neebe halao iha Oecusse, tanba nee PA-RAEOA, Regio da Cruz Salu hatoo parabens no apresia ba servisu APC-RAEOA.
Informasaun nee hatoo husi Komandante APC, Joao da Silva Sila dehan APC-RAEOA hanesan instituisaun ida indireita iha RAEOA.
“Ohin ita estrutura tomak APC iha RAEOA mai aprezenta progresu serbisu ba PA-RAEOA, tanba iha mudansa Prezidente anterior sempre ita mai relata APC ninia serbisu no ohin mos lori estrutura tomak APC serbisu nia servisu durante nee iha RAEOA, tanba nee ita husu ba Autoridade RAEOA mos konta mos ho APC nia serbisu iha Oecusse,” dehan nia ba STL iha Salaun Gabinete Autoridade Oebau, Suku Costa, Postu Administrativu Pante Makassar RAEOA.
Nia haktuir tan katak iha estrutura APC kompostu husi Komandante APC, Korpu de Bombeirus ho xefe departementu 5 kompostu husi Departamentu Rekoperasaun, Departamentu Emerjensia reforsa, Departamentu prevensaun no mitigasaun, Departamentu rekursu umanus iha RAEOA.
“Husi fulan Janeiru too data ohin 18 Marsu 2026, APC atende ona kazu dezastre iha Oecusse hamutuk 23 kazu dezastre ho tipu dezastre oi-oin no husi kazu hirak nee ita responde emerjensia ona ba sira ho sasan food Item no nonfood Item nuee husi kazu dezastre hirak nee, laiha kazu grave hanesan mota sae iha komunide nia uma hanesan tinan kotuk, tinan nee udan ho velosidade normal hela, tanba nee laih kazu seriu neebe APC atende ba povu iha Oecusse,” dehan nia.
Iha biban nee, PA-RAEOA, Regio da Cruz Salu dehan ba oin Autoridade RAEOA konta nafatin ho servisu APC iha Oecusse.
“Ita mos hanoin atu movimenta mos potensia dezastre ba komunidade sira neebe maka hela iha rai loron sira atu halo prevensaun. Ami hamutuk ho Xefe Suku sira propoin, atu proteje bee matan sira iha rai lolon, ba oin foho lolon, povu labele halo ona toos ho lere ai iha foho neeba ona hodi kuda ai bamboo iha neeba, atu proteze bee matan sira, tanba nee tempu badak sei mobiliza ema barak hodi halao programa nee,” dehan PA-RAEOA, Regio da Cruz Salu iha enkontru ho Komandante APC ho estrutura.
Iha biban nee, PA-RAEOA mos apresia tebes ho serbisu APC ho ninia estrutura sira iha Oecusse neebe maka halo serbisu atende povu ninia nesesidade iha tempu neebe povu enfrenta problema dezastre iha Oecusse.
(jos)
