DILI, STLTIMORLESTE.com – Tinan nee, Dili Institute Of Technology (DIT) hetan subvensaun públiku husi Ministeriu Ensinu Superio Siensia no Kultura (MESSK), tanba nee DIT halo ona proposta ba iha ministériu refere.
Kestaun nee hatoo husi Reitor Dili Institute Of Technology (DIT), Salustiano dos Reis Piedade ba jornalista STL liu husi telefone, Kinta nee (19/03/2026).
“Tinan nee DIT hetan rihun 53 karik, maibe seidauk, foin mak sira haruka ami halo proposta, ami hatama tiha ona ba parte MESSK. Ami nian proposta nee hatama dezde iha semana kotuk, nee mak sira husu dehan rihun 53, nee duni halo planu nee bazeia ba rihun 53, sei koloka nafatin ba area neebe uluk sira fo nee,” nia afirma.
Tanba tuir Reitor DIT nee katak, subvensaun ba tinan nee DIT hetan sei fo apoiu ba estudantes, dosentes no ida seluk tan neebe ladun lembra, maibe ninia kontiudu nee kada tinan kuaze hanesan deit.
“Ami nian proposta nee ami hatama iha loron Segunda semana kotuk, tanba tinan nee ami nafatin hetan subvensaun públika husi ita nian governu liu husi MESSK, osan nee sei fo apoiu ba asuntu hirak neebe mak ohin hau mensiona,” nia dehan.
Nunee mos Reitor Instituto Ciência Saude (ICS), Leao Borges hatete, agora daudaun ICS prepara hela proposta subvensaun nian hodi bele submete ba ministériu, tanba data ikus hatama proposta nee bainrua, nee hanesan baibain, sei fo apoiu ba ekipamentus mediku nian, laboratoriu ninia nomos fo apoiu ba dosentes no estudantes sira.
“Kona-ba subvensaun ba tinan ida nee ami simu ona karta husi MESSK, agora ami prepara hela ami nian proposta atu hatama, montante subvensaun ba tinan ida nee hamutuk quarenta nove mil sesentos vinte quatro. Ami simu ona karta husi MESSK, nee duni agora daudaun ami prepara hela ami nian proposta submete ba Ministériu refere,” nia informa.
Iha fatin seluk, Reitor East Timor Coffee Institute ( ETCI), Mateus Maia de Jesus antes nee dehan, iha tinan 2025, East Timor Coffee Institute ( ETCI) la hetan subvensaun públiku, tanba hetan transformasaun.
“Hau hanoin kona-ba subvensaun, ami nian relatóriu hatama iha loron 15 Janeiru tinan 2025, maibe ida nee subvensaun neebe mak ami hetan husi MESSK iha tinan 2024 ninia, nee ami hatama relatoriu tuir kalendariu ministeriu nian. Ami iha 2025 la hetan subvensaun públika husi MESSK, tanba hetan transformasaun, tanba nee ba tinan 2025 ami la hetan subvensaun,” nia dehan.
(jac)
