DILI, STLTIMORLESTE.com – Prezidente Republika Jose Ramos Horta rekomenda selebrasaun ba tinan 30 CPLP selebra iha Lisboa, maibe Governu liu husi Ministru Negosiu Estranjeiru no Kooperasaun, Bendito Freitas diskute katak sei halao iha idak-idak nia nasaun.
Primeiru Ministru Kay Rala Xanana Gusmão ba jornalista iha Palasiu Prezidensia Nicolau Lobato, Bairo Pite, Kinta nee (19/03/2026) hatete, antes nee Prezidente Republika husu Governu katak karik bele realiza tinan 30 CPLP ba dala 30 iha Lisboa, maibe ho diskusaun neebe iha katak iha selebrasaun nee sei halao iha nasaun idak idak nia.
“Hau mos informa ba Prezidente ultima ves hau hasoru Prezidente Republika propoin atu simeira CPLP tinan ida nee halo 30 anos atu halo iha Lisboa mais Ministru Bendito dehan katak sei diskute iha neeba mais sei la halo iha 30 anos nee idak idak halo iha nia rai, nee duni sei lahalo iha neeba maibe tanba ita boot mos kaer Prezidensia CPLP hanesan buat ida ita lahalao serbisu ruma mais lolos nee ita so simu ba iha 2027,” dehan PM Xanana.
PM Xanana dehan iha tinan 2027 mak sei haree oinsa konaba Simeira CPLP nia, maibe Prezidensia CPLP nee iha Timor nia liman, maibe agora nee haree hela deit.
Antes nee Prezidente Republika (PR), Jose Ramos Horta rekomenda Governu diak liu halo selebrasaun ba tinan 30 ezistensia Comunidade dos Países de Língua Portuguesa (CPLP) halao iha Lisboa, Portugal.
“Governu mak sei deside atu halo iha neebe, hau nia rekomendasaun diak liu halo iha Lisboa, Portugal? Tanba Primeiru ano fundasaun hahu CPLP nee iha Lisboa, 30 anos diak liu iha neeba, nee mos fasil liu ba sira rai seluk ba ita mak dook liu oituan ba mais sira seluk besik, estrutura oin-oin prepara iha neeba nee kmaan ba Govenu para halo simeira selebrasaun 30 anos,” dehan PR Horta.
Prezidente Republika hatete, bainhira hatoo rekomendasaun nee ba Primeiru Ministru kontente ho ideia nee diak liu, maibe desizaun neebe Governu halo definitivu PR konkorda.
Desizaun neebe Governu halo definitivu Prezidente konkorda, nee kompetensia Governu nia, aaibe Prezidente fo ideia nee para hanesan kmaan ba Governu no kmaan ba hotu hotu, maibe desizaun hotu hotu husi Governu.
(eme)
