DILI, STLTIMORLESTE.com – Primeiru Ministru Kay Rala Xanana Gusmao hatete Ministru hotu hotu apresia ba Ernst & Young neebe halo auditoria forense ba irregularidade neebe akontese iha Timor Leste liga ho Roo Haksolok.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (19/03/2026).
Iha hasoru malu nee Primeiru Ministru mos imforma ba Prezidente Republika katak, iha loron kuarta Ministru fo apresiasaun boot ba Ernst & Young neebe halo hotu tiha ona auditoria Forense.
“Auditoriu Forense nee katak auditoriu neebe haree ba sala hotu hotu iha iregularidade oinusa, para bele aprezenta dadus konkretu konaba saida deit mak akontese, iha aspektu politiko, tekniku, aspektu institusional liu liu aspektu ida korupsaun,” katak PM Xanana.
Bainhira rona hotu fo apresiasaun boot tebes ba Ernst & Young, nee Governu mak husu atu halo, selae Governu mak halo sei mosu lamentasaun oin oin.
“Se ami mak halo sei mosu dehan politizado so mai husi estranjeiru hodi hatudu mos katak problema jestaun, problema instituisaun atu halo saida falta relatoriu falta artigu nee ita koalia tiha ona, iha nee mos iha auditoriu Forense neebe fo mai mos dokumentus lakon hotu buat sira nee hotu ida nee mak sei sala boot kuandu Ernst & Young haruka ona mai Governu relatoriu neebe boot ho dokumentus ho prova buat sira nee hotu, konaba buat rua konaba aviaun neebe iha hela neeba nee nomos konaba Roo Haksolok mak Governu sei haruka ba prokuradoria jeral Republika atu hahu ona investigasaun ho prosesu legal,” dehan PM Xanana.
Iha loron kuarta Sorumutu Konsellu Ministrus loron 18 fulan-marsu tinan 2026 analiza konkluzaun ba auditoria forense neebe halao husi EY Portugal kona-ba prosesu akizisaun no jestaun aviaun Twin Otter no mos konstrusaun ro Haksolok, neebe halao husi Autoridade Rejiaun Administrativa Espesial Oekusi Ambenu.
EY Portugal halo parte iha rede internasional Ernst & Young, organizasaun servisu profisional ida neebe boot liu iha mundu, ho esperiensia hodi halao auditoria ba entidade publika no privada sira.
Durante sorumutu, aprezenta deskrisaun ida kona-ba prosesu akizisaun, jestaun no konstrusaun ba ekipamentu sira neebe temi ona, no mos konkluzaun prinsipal sira hosi auditoria forense.
(eme)
