BAUKAU, STLTIMORLESTE.com – Sentru Nasional Kuidadu Kritiku no Resposta ba Trauma (NCCTRC – sigla inglês) hamutuk ho Institutu Saude Publiku Timor Leste (INSPTL) fo treinamentu ba mediku no enfermeiru iha area kuida saude urjente.
Enfermeira Edukador husi NCCTRC, Beth Price hateten, treinamentu refere realiza tanba NCCTRC konvite husi Hospital Rejional Eduardo Ximenes (HoREX) Baukau atu fo treinamentu ba mediku no enfermeiru sira ba area kuidadu saude urjente nian, maibe involve mos mediku no enfermeiru sira husi Hospital Rejional sira seluk inklui Hospital Referal no Nasional.
“Treinamentu nee halai liu kona-ba kuidadu kritiku nian, neebe signifika kazu neebe mai ho emerjensia nee oinsa mak ita nia mediku sira iha sala emerjensia nee halo atendimentu,” Enfremeira Edukador Beth Price hateten jornalista sira iha HoREX Baukau, Segunda (23/03/2026).
Nia sublina, treinamentu refere objetivu atu reforsa nafatin mediku sira nia konhesimentu atu halo atendimentu nafatin kazu emerjensia sira iha Hospital Rejional no Referal sira hodi reduz numeru kazu emerjensia ba Hospital Nasional.
“Tanba nee mai hasae kapasidade oinsa atende kazu sira neebe bele atende iha nee bele atende, karik atu refere ida neebe hanesan sira labele atende,” Beth Price fundamenta.
Iha fatin hanesan, koordenador formasaun husi INSPTL, Enfermeiru Francisco Borges salienta, treinamentu refere durante loron 3 ho modalidade teoria no barak liu pratika estruturadu ba identifikasaun pasiente husi kazu emerjensia sira atu hetan tratamentu lalais no seguru.
“Pratika mak barak liu ba kazu sira neebe sira enfrenta loron-loron, husi kazu sira nee mak ami diskute nunee sira bele hetan esperiensia diak liu tan,” katak Francisco Borges.
Enkuantu Diretor Ezekutivu HoREX Baukau, Claudino Ximenes agradese ba treinamentu refere, tanba bele eleva mediku no enfermeiru sira nia konhesimentu atende pasiente sira iha sala Intensive Care Unit (ICU) HoREX, maibe hetan partisipasaun mos mediku no enfermeiru sira husi Hospital Rejional seluk inklui Hospital Referal no Nasional.
“Treinamentu ida nee laos foku deit ba HoREX, maibe Hospital Oekusi, Maliana, Suia, Maubisi, HNGV ho HoREX sira iha nee simu treinamentu haklean sira nia konhesimentu depois kontinuasaun sira fahe ba malu ba kada pesoal saude sira iha Hospital ida idak,” Claudino informa.
Entretantu mediku no enfermeiru neebe involve iha treinamentu nee hamutuk nain 20 kompostu feto mane husi Hospital Rejional, Referal sira iha territoriu nasional inklui mediku no enfermeiru balu husi Hospital Nasional Guido Valadares (HNGV) Dili, neebe treinamentu refere realiza iha Hospital Rejional Eduardo Ximenes (HoREX) Baukau durante loron 3, husi loron 23 no termina iha loron 25 Marsu nee.
(tom)
