DILI, STLTIMORLESTE.com – Dirijenti husi Eskola Sekundariu Jeral nu. 4 Setembru Balide husu komunidade atu koopera ho parte governu hodi hamamuk fatin.
“Foin daudaun semana hira ba kotuk nee, husi parte Edukasaun Munisipiu Dili mos mai ona iha nee, koalia ona ho ita nian komunidade sira nee, tanba bainhira governu atu hasai sira nee sira mos tenke prepara aan, tanba nee hau mos hatoo ida nee katak, se bele lais diak liu, ho nunee bainhira eskola nee kuandu sai portaun eskola nian nee savi,” dehan Diretor ESJ nu. 4 Setembru Balide Sergio A. da Cruz ba STL iha nia knaar fatin Balide, Segunda nee (23/03/2026).
Sergio dehan, durante nee bainhira estudantes sira sai ona husi eskola, maibe tanba komunidade sira hela iha areador eskola nian, entaun sira nafatin tama sai, sira iha xefe família nee neen, maibe sira hela iha uma tolu.
“Ida mak momentu ai dodok hotu ona, depois atu tidin fali besi halo foun, hau mak bandu, nee labele tanba nee laos rai privadu. Maibe xefe família neen nee prontu koopera ho eskola, sira hatoo mai hau katak, sira hein notifikassun deit, bainhira karta notifikassun nee tun sira prontu atu koopera. Hau hanesan direjente husi eskola ida nee, hau hatene deit uma kain hira mak hela iha nee, bainhira governu mai husu koopera hamamuk fatin, nee presiza koopera ho governu,” nia komenta.
Nia akresenta, durante nee dala ruma aprendizajen lao hela, maibe komunidade sira nee halo movimentu tama sai iha areador eskola nian,” nia haktuir.
Entretantu Diretor Nasional Ensinu Sekundariu iha ME, Benjamin Gomes da Cruz Fernandes hatete, nee duni kona-ba asuntu ida nee fo kompetensia ba Diretor Servisu Edukasaun Munisípiu Dili nomos parte SEATOU ninia, tanba eskola sekundariu balun iha Dili, komunidade sura sei hela iha areador eskola nian.
“Hau hanoin kona-ba ita nian okupantes sira iha areador eskola nee, nee kompetensia Edukasaun Munisipiu Dili, sira mak iha kompetensia, ami nian lina koordenasaun neebe mak diak ho sira, ami nafatin fo kompetensia sira atu bele haree asuntu ida nee,” dehan nia.
(jac)
