DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu ho inisial CdA, tanba deskonfia sona nia feen matebian Veronica Dos Santos.
Ministeriu Publiku promove arguidu mai iha Tribunal ho krime omisidiu simples inklui krime rua.
Juiz Turnu Cipriano Sarmento halo tiha identifikasaun ba arguidu, no deside tama ba iha faze alegasaun husi Ministeriu Publiku no Defeza arguidu nian.
Iha alegasaun Ministeriu Publiku neebe reprezenta husi Prokuradora Bemvinda Do Rojario, husu Tribunal atu aplika Medida Prizaun Preventiva (PP) ba arguidu, tanba konsidera iha indisus forte ba krime neebe promove mai iha Tribunal.
Enkuantu husi parte defeza neebe reprezenta husi Defensor Publiku Sergio Dias Quintas aseita ho pedidu Ministeriu Publiku nian atu aplika medida Prizaun Preventiva ba iha arguidu, atu asegura arguidu hodi labele akontese tan problema foun.
Rona tiha alegasaun husi MP no defeza, ikus mai Juiz turnu deside adia prosesu nee ba iha loron Tersa (24/03/2026) hodi rona despaisu husi Tribunal nian.
Prosesu nee prezide husi Juiz Estajiariu Cipriano Sarmento no Ministeriu Publiku reprezenta husi Prokuradora Bemvinda Do Rojario, arguidu hetan asistensia legal husi Defensor Publiku Sergio Dias Quintas.
Tuir kronolojia katak, iha loron Sabadu (21/03/2026) madrugada haleu oras tuku 03:50 OTL tl, insidente ida akontese iha Pantai Kelapa tasi ibun besik loja Seara nian, entre feen no laen, no ikus mai deskonfia laen oho feen.
Iha momentu neeba Forensik foti kedan mate isin lori ba iha mortuariu Hospitál Nasionál Guido Valadares (HNGV) hodi halo autopsia, no arguidu detein kedas iha Komando Munisipiu Dili hodi submete mai iha prosesu Primeiru Interogatoriu.
(ter)
