DILI, STLTIMORLESTE.com – Desizaun Ministra Saude (MS), Elia A..A dos Reis Amaral nian neebe hili lori oan ba halo tratamentu iha klinika privadu duke Hospital Nasional Guido Valadares (HNGV), hamosu kritika makaas husi publiku kona-ba kualidade investimentu estadu nian iha setor saude.
Komunidade kestiona katak, enkuantu estadu hasai ka gasta orsamentu milhaun ba milhaun de dolares tinan –tinan atu dezenvolve HNGV hanesan hospital referensia nasional, maibe iha pratika membru Governu sira rasik hatudu menus konfiansa ba kualidade servisu neebe sira jere.
“Ita haree osan barak gasta ba HNGV sosa ekipamentu no fo formasaun ba mediku sira, maibe tanba sa Ministra Saude rasik mos la asente seguru atu uza fali fasilidade nee ba nia familia, ida nee kestiona tebes kulidade husi investimentu neebe ita halo,” dehan sidadaun ida ho naran, Mariana Soares da Silva ba jornalista STL, bainhira halao hela tratamentu saude iha HNGV, Dili, Tersa (24/03/2026).
Preokupasaun nee mosu tanba sidadaun barak sente katak iha diferensa tratamentu entre elite ho povu baibain. Enkuantu povu kiik laiha opsaun seluk duke hein linha naruk iha HNGV, lideransa sira uza kbiit ekonomiku hodi buka seguransa iha klinika privadu sira.
Nunee mos Observador Politika, Jose dos Santos Magno hatete, desizaun nee fo imajen neebe la diak ba publiku. ”Se Ministra Saude rasik la fiar kualidade HNGV atu trata ninia familia, oinsa mak nia bele konvense povu baibain katak, kualidade saude iha ita nia rai rasik,” Jose kestiona.
Nia hatutan, maski nuudar sidadaun, Ministra iha direitu atu hili fatin tratamentu, maibe nuudar governante, nia iha responsabilidade moral atu sai ezemplu.
Entretantu too notisias nee STL hatun, parte Ministeriu Saude (MS) seidauk fo kualker esplikasaun ba kestaun nee.
(car)
