DILI, STLTIMORLESTE.com – Dili Institute Of Technology (DIT) nafatin hadia rekursu dosentes, hodi haruka dosentes ba kontinua estudu iha programa mestradu no doutoramentu.
“Iha DIT, primeiru ami hadia nafatin rekursu dosentes sira, ida nee ita tenke halo, tanba ami haruka ami nian dosentes sira ba hodi kontinua nafatin sira nian estudu iha programa mestradu no doutoramentu, agora daudaun nee kuaze dosentes DIT nee hotu-hotu mestradu, entaun ami tinan-tinan nee, tuir DIT nian kbiit ami haruka nafatin kontinua sira nian programa doutoramentu,” dehan Reitor Dili Institute Of Technology (DIT), Salustiano dos Reis Piedade ba STL iha DIT, Tersa nee (24/03/2026).
Nia dehan, ida seluk mak tenke hadia laboratoriu para estudante sira aprende pratika no teoria, ida seluk sira mos buka para hadia internalmente iha DIT, para halo atendimentu neebe diak ba estudantes sira, ida nee mak dalan ema seluk labele haree.
“Ami atu halo kurrikulu, dezenhu kurrikulu, hanorin ida nee mak internalmente DIT halo. Nee duni ami nafatin haruka ami nian dosentes sira kontinua sira nian estudu iha area mestradu no doutoramentu ninia,” nia dehan.
Nia salienta, agora daudaun total dosentes iha DIT hamutuk 137, profesor doutoradu nain 5, nivel doutoramentu nain 17, kandidatu doutoramentu nain 12, nivel maestradu nain 70, kandidatu mestradu nain 7, nivel lisensiatura nain 27 iha lingua.
Nunee mos Reitor East Timor Coffee Institute ( ETCI), Mateus Maia de Jesus hatete, East Timor Coffee Institute (ETCI) nafatin hasae kualidade dosentes no daudaun nee dosentes 11 kontinua estudu iha rai liur.
“Ami nian kapasitasaun dosentes ba tinan ida nee laiha, maibe iha tinan kotuk ami haruka tiha ona, tanba antes nee ami haruka ona dosentes ba kontinua estudu iha rai liur hamutuk nain 11, nee ba iha nasaun Indonezia ho Brazil, nee ba mestradu ho doutoramentu, dosentes nain 11 nee ba iha area agrikultura hotu,” dehan nia.
Reitor ETCI nee akresenta, dosentes ba area mestradu nee remata ona, doutaramentu nee mak sei finaliza iha tinan ida nee nia laran, ETCI nee iha fakuldade tolu deit, nee mak hanesan agrikultura, edukasaun no ekonomia.
“Hau hanoin ami nian dosentes S1 nain 5 nunee, maibe ami nian planu nee haruka sira ba kintinua estudu iha tinan oin, tanba depende ba iha orsamentu, maibe sira nee sai asisten dosente,” katak nia.
(jac)
