DILI, STLTIMORLESTE.com – Dili Institute Of Technology (DIT) planu sei loke tan kampus rejional Baukau, tanba agora daudaun sei iha faze estudu viabilidade.
Haktuir Reitor Dili Institute Of Technology (DIT), Salustiano dos Reis Piedade ba jornalista STL iha nia knaar fatin DIT, Tersa nee (24/03/2026).
“Iha planu sei loke tan Kampus Rejional Baukau, agora daudaun iha hela faze estudu viabilidade, liu husi estudu nee mak ita hetan informasaun hodi loke departamentu saida iha nee ba. Maibe antes atu loke, bazeia ba rezultadu estudu nee mak sei hatoo proposta ba Ministeriu Ensinu Superior Siensia no Kultura para hetan lisensiamentu operasional. Kuandu iha ona lisensiamentu operasional mak foin bele loke, neebe sei iha prosesu naruk ida atu loke Kampus Rejional Baukau,” nia afirma.
Reitor DIT nee hatutan, klase iha RAEOA lao hanesan mos iha Dili, tanba sira Kampus iha, biblioteka iha, no dosente iha, maibe dosente husi DIT mos ba ajuda hanorin, se sira fo unidade kurikular balun mai iha Dili. Dosente sira neebe sira fo unidade kurikular ba hanorin iha departmentu Siensia komputador, Jestaun finance, Jestaun Jeral no enginaria Civil.
Iha fatin seluk, Reitor Instituto Superior Cristal (ISC), Sebastiao Pereira dehan, ISC seidauk iha planu loke tan polo iha munisipiu seluk, tanba nee sei mantein polo tolu neebe daudaun nee eziste ona.
“Ami nian polo tolu iha munisipiu tolu nee agora daudaun sei nafatin, nee mak eskola polo husi Munisipiu Baukau, Manufahi no Aileu, ba oin sei la loke ona iha munisipiu seluk, tanba ami sei mantein ho polo tolu neebe mak daudaun nee iha,” nia esplika.
Nia dehan, ninia prosesu ensinu aprendizajen iha eskola polo tolu nee lao diak hanesan baibain, tanba kada dosentes idak-idak halao ninia prosesu aprendizajen ba estudantes lao ho diak, nee duni polo tolu nee halo ninia atividades lao diak.
(jac)
