DILI, STLTIMORLESTE.com – Hela tan semana rua nia laran depois festa paskua estudantes sira atu halao ezame primeiru periodu nian, tanba nee estudante sira tenke hahu prepara aan hodi estuda fila fali materia sira neebe mak simu husi profesor kada disiplina sira, atu nunee bele ajuda no fo hanoin sira iha ezame primeiru periodu nian.
Profesor EBF Sare, João Soares dehan, hanesan profesor sempre fo hanoin bá estudante sira atu uza tempu barak hodi estuda materia sira neebe simu husi profesor kada disiplina sira, labele hein besik ezame mak foin hakfodak estuda, maibe depois fila uma uza tempu minutu balun hodi lee fila fali, atu nunee hodi fo hanoin nafatin kona bá materia nee. Labele hein too atu prova ka ezame mak foin estuda.
“Nuudar profesor, ami sempre fo hanoin bá alin estudante sira atu uza tempu balun hodi estuda fila fali materia neebe mak ami profesor disiplina fo ba sira, depois fila eskola uza minutu balun hodi lee fila fali materia nee iha uma. Atu nunee bele fo hanoin fila fali ita nia memoria no bainhira tama bá prova ka ezame nee hein prepara aan deit ona. Labele hein too livru laran nakonu mak foin estuda dala ida, ou se lae hein prova no ezame mak foin estuda dala ida, nee la diak,” dehan nia bá STL iha Vila Verde, Tersa (24/03/2026).
Nia katak, estudante tenke estuda antes, kona bá materia sira neebe profesor kada disiplina fo no esplika iha aula laran, nunee bainhira atu halo prova ruma ka ezame periodu nian, nee bele dehan sira halo preparasaun diak bá sira nia aan. Bainhira tama ba ezame periodu nian profesor kada disiplina sira sei halo tan prova diaria nomos halo rezumu hodi fo bá estudante sira, ho objetivu mak atu fo hanoin fila fali bá sira kona bá materia hotu neebe mak sira simu ona hodi ajuda sira iha ezame laran.
Nunee mos Profesor Sao José Operario, Silverio Rebelo dehan, estudante nia knaar nee mak estuda iha eskola, no bainhira fila bá uma kontinua estuda fali materia neebe profesor disiplina sira fo. Sira tenke estuda diak para bele prepara aan bá halao ezame segundu periodu nian ho diak. Antes atu tama bá ezame periodu nian profesor kada disiplina sira mos sei halo prova oral no eskrita, nomos halo rezumu hodi fo bá sira estuda iha uma.
“Atu hetan valor diak nee fila fali bá pesoal estudante sira. Se kuandu sira estuda ho diak, sira sei hetan valor mos diak. Neebe estudante nia knar nee mak estuda. Estuda nee tenke antes atu halo prova ruma ka ezame periodu nian tenke prepara aan antes atu tama bá ezame periodu nian,” dehan nia.
Nia hatutan, nuudar manorin nain laos hanorin deit maibe sempre fo hanoin mos bá estudante sira atu estuda makaas, para iha ezame nee bele hetan rezultadu neebe diak. Sempre fo hanoin bá sira atu prepara aan antes molok tama bá prova ka ezame periodu nian.
Nunee mos Estudante husi Eskola Pre-Eskolar Sekundariu São Pedro, Amelia da Costa hatete, depois festa paskua hotu tama iha loron Segunda (06/04/2026) sira hahu ezame primeiru periodu nian ona. Neebe daudaun nee kada profesor disiplina halo prova oral no eskrita nomos pratika hodi fo hanoin no ajuda sira iha ezame primeiru periodu nian.
“Iha eskola profesor kada disiplina sira sempre fo hanoin ami estuda tutuir materia neebe sira fo, atu nunee bainhira sira prova ami bele resposta ho diak. Agora dadaun ami prova hela deit materia husi kada disiplina sira, nunee hodi fo hanoin ami iha izame mai,” dehan nia.
Nia hatutan, iha semana kotuk no semana nee, sira simu rezumu materia foto kopia kada disiplina husi profesor sira hodi estuda iha uma. Hanesan estudante tenke estuda, hodi prepara aan hasoru izame periodu nian no hetan rezultadu neebe diak hatudu bá Inan aman sira.
(dom)
