DILI, STLTIMORLESTE.com – Prezidente Republika (PR), Jose Ramos Horta halo despedida ho Embaixador Indonezia ba Timor Leste no Embaixador India ba Timor Leste iha Palasiu Prezidensia Republika.
Iha loron Kuarta (25/03/2026) Prezidente no Laureadu Nobel ba pas, Jose Ramos Horta despede Embaixador Estraordinariu no Plenipotensiariu Republika Indonezia nian iha Timor Leste, Okto Dorinus Manik no Embaixador Estraordinariu no Plenipotensiariu Republika Índia nian iha Timor Leste, Shri Madan Kumar Ghildiyal.
Serimonia despedida neebe halao iha Palasiu Prezidensial Nicolau Lobato, selebra embaixador sira nia dedikasaun pesoal, sira-nia servisu diplomatiku ezemplar, no forsa duravel hosi parseria entre Timor-Leste no sira-nia nasaun.
Embaixador Okto Dorinus Manik halao ona knaar nuudar Embaixador Indonezia nian mai Timor-Leste husi fulan-Novembru 2021 too fulan-Marsu 2026. Durante ninia knaar iha Dili, nia serbisu besik ho parte interesada oioin, inklui ofisial governu nian, líder emprezarial, no komunidade enjeral. Ninia inisiativa sira inklui fasilita enkontru entre xefe estadu sira, ofisial sira ministeriu nian, autor emprezarial sira, no fo apoiu makaas ba Timor-Leste nia esforsu adezaun ba ASEAN.
Iha ninia lideransa, projetu konkretu oioin implementa ona, inklui lansamentu ba transporte fronteira ho servisu bis direta entre Dili no Kupang iha tinan 2023, no kooperasaun teknika iha setor oioin hanesan dezenvolvimentu sentru akua-kultura iha Aileu, programa bolsa estudu, apoiu agrikultura, no projetu kolaborativu sira seluk. Embaixador mos envolve ativamente iha inisiativa sosial sira ba sidadaun Indonezia no komunidade lokal, inklui servisu kuidadu saude iha Igreja Dare iha tinan 2024. Nuudar dekanu diplomatiku, Embaixador Okto hametin relasaun sira ho korpu diplomatiku sira iha Timor-Leste. Nuudar rekonesimentu ba nia realizasaun sira, Embaixador Okto simu nomeasaun atu kontinua nia servisu nuudar Embaixador Indonezia nian ba Papua Nova Guine.
Iha biban nee Prezidente Ramos-Horta liu husi Diskursu iha palasiu Kuarta 26/03/2026 louva Embaixador Okto Dorinus Manik neebe konsolida parseria abranjente entre vizinu rua nee.
Nuudar rekonesimentu ba ninia servisu esepsional, Prezidente kondekora Embaixador Okto Dorinus Manik ho Grau Kolar Orden Timor-Leste nian, ida hosi distinsaun aas liu nasaun nian, tuir Dekretu Prezidente Republika Nu.28 /2026.
“Ita-nia ligasaun ho Indonezia abut iha jeografia, istoria komun, no espíritu kooperasaun neebe kontinua dezenvolve. Hein katak kondekorasaun ida-nee bele simboliza amizade neebe dura, konfiansa, no prosperidade komun entre ita-nia povu,” afirma Prezidente J. Ramos Horta.
Embaixador Okto Dorinus Manik lakleur tan sei sai husik Dili hodi asume ninia knaar foun nuudar Embaixador Indonezia nian ba Papua Nova Guine.
Iha serimonia neebe hanesan, Prezidente Ramos-Horta mos despede Embaixador Estraordinariu no Plenipotensiariu Republika Índia nian iha Timor-Leste, Shri Madan Kumar Ghildiyal.
Embaixador Shri Madan Kumar Ghildiyal, diplomata kareira ho servisu liu dekada tolu, asume nia kargu iha Timor-Leste iha loron 28 fulan-Marsu tinan 2025.
Durante ninia mandatu, Índia no Timor-Leste hametin liu tan sira-nia kooperasaun bilateral liuhosi inisiativa oioin neebe inovadoras, Nasaun rua nee konkorda ona atu estabelese Sentru Exelensia iha Teknolojia Informasaun nian iha kampus Hera husi Universidade Nasional Timor Lorosae (UNTL), neebe reflete sira-nia kompromisu hamutuk atu avansa kapasidade dijital. Kolaborasaun iha kapasitasaun mos habelar ona iha ambitu Programa Koperasaun Teknika no Ekonomika Índia nian (ITEC), ho Embaixada Índia fasilita oportunidade formasaun ba funsionariu publiku Timor-oan sira. Notavelmente, ofisial nain sanulu hosi Komisaun Funsaun Publika, Ministeriu Finansas, no Ministeriu Transporte no Komunikasaun partisipa iha programa formasaun espesializadu ida kona-ba siberseguransa iha New Delhi durante fulan-Fevereiru too fulan Marsu 2026, enkuantu diplomata nain sanulu-resin-ida tuir Kursu Diplomatiku Espesial iha fulan Marsu 2026. Iha setor saude, Memorandu Entendimentu kona-ba Kuidadu Saude renova ba períodu tinan lima tan, hodi sublina kooperasaun kontinua iha saude publika.
Envolvimentu iha promosaun turizmu mos reforsa ona, inklui partisipasaun husi ofisial nível Diretor ida no profisional turizmu nain rua husi Timor-Leste iha Programa Interkambiu Turizmu ASEAN–Índia neebe halao iha Bangalore no Guwahati, no mos eventu promosaun turizmu neebe organiza husi Embaixada Índia ho partisipasaun husi Diretor Jeral Turizmu. Aleinde nee, Embaixada parseria ho Ministeriu Juventude, Desportu, Arte no Kultura Timor-Leste nian, organiza selebrasaun Loron Internasional Yoga, hodi haburas liutan relasaun kultural no ligasaun entre povu nasaun rua nee.
Prezidente Ramos-Horta elojia Embaixador Ghildiyal tanba avansa dialogu sira iha nivel aas, kooperasaun defeza, no esforsu sira kapasitasaun nian. Maski regulamentu Índia nian neebe prevene atribuisaun Orden Timor-Leste nian, Prezidente espresa publikamente apresiasaun klean ba diplomasia vizionariu husi Embaixador Ghildiyal.
“Índia nia apoiu jenerozu iha saude, edukasaun, no infraestrutura iha impaktu neebe klean tebes ba komunidade Timor-oan sira. Embaixador nia legadu amizade, kolaborasaun, no diplomasia vizionariu sei kontinua inspira relasaun Timor-Leste no Índia ba tinan barak tuir mai,”deklara Prezidente J. Ramos-Horta.
Serimonia despedida nee konklui ho Prezidente Ramos-Horta hatoo nia apresiasaun klean liu ba embaixador nain rua no espera atu kontinua harii sira nia legadu ho sira-nia susesor.
(eme)
