DILI, STLTIMORLESTE.com – Prezidente Republika (PR), Jose Ramos Horta kondekora Kolar Orden Timor Leste ba Embaixador Indonezia ba Timor Leste, Okto Dorinus Manik.
Iha biban nee Prezidente Republika Jose Ramos Horta liu husi Diskursu iha Palasiu Prezidensia Nicolau Lobato, Bairo Pite, Kuarta (25/03/2026) hatete, nuudar rekonhesimentu ba ninia servisu esepsional, Prezidente kondekora Embaixador Okto Dorinus Manik ho Grau Kolar Orden Timor Leste nian, ida husi distinsaun aas liu nasaun nian, tuir Dekretu Prezidente Republika Nu.28 /2026.
Embaixador Okto Dorinus Manik halao ona knaar nuudar Embaixador Indonezia nian mai Timor Leste husi fulan Novembru 2021 too fulan Marsu 2026. Durante ninia knaar iha Dili, nia servisu besik ho parte interesada oioin, inklui ofisial governu nian, líder emprezarial, no komunidade enjeral.
Ninia inisiativa sira inklui fasilita enkontru entre xefe estadu sira, ofisial sira ministeriu nian, autor emprezarial sira, no fo apoiu makaas ba Timor-Leste nia esforsu adezaun ba ASEAN.
Iha ninia lideransa, projetu konkretu oioin implementa ona, inklui lansamentu ba transporte fronteira ho servisu bis direta entre Dili no Kupang iha tinan 2023, no kooperasaun teknika iha setor oioin hanesan dezenvolvimentu sentru akua-kultura iha Aileu, programa bolsa estudu, apoiu agrikultura, no projetu kolaborativu sira seluk nomos atividade lubuk seluk tan.
“Ita-nia ligasaun ho Indonezia abut iha jeografia, istoria komun, no espíritu kooperasaun neebe kontinua dezenvolve. Hein katak kondekorasaun ida-nee bele simboliza amizade neebe dura, konfiansa, no prosperidade komun entre ita-nia povu,” afirma Prezidente J. Ramos-Horta.
Embaixador Okto Dorinus Manik lakleur tan sei sai husik Dili hodi asume ninia knaar foun nuudar Embaixador Indonezia nian ba Papua Nova Guine.
Nunee mos Embaixador Indonezia ba Timor Leste Okto D. Manik, hatoo agradese ba Maromak, ba grasa neebe hetan simu kondekorasaun husi Prezidente Repúblika Timor Leste. Premiu ida-nee estraordinariu duni.
“Kompleta tiha ami-nia knaar tinan 4 no fulan 4iha Timor Leste laos deit premiu pesoal ida ba hau, maibe mos serbisu husi ami-nia ekipa tomak, inklui Embaixada Indonezia, setor Empreza Estadu, Pertamina, Mandiri, no BRI Telkomsel, hamutuk ho avansu barak neebe alkansa iha nee. Hamutuk ho ita nia padre no madre sira mos iha kotuk,” dehan Embaixador Indonezia ba TL.
Embaixador hatete, susesu hotu laos servisu mesak, maibe hamutuk ho belun hotu-hotu no ekipa tomak nia servisu.
Nia mos hatoo Obrigado ba rekoinesementu hodi kondekora ho premiu Ordem Timor Leste ida nee hanesan parte ida husi kolaborasaun ho Timor Leste. labele serbisu mesak servisu hamutuk ho governu Timor Leste no maluk Timor Leste sira.
(eme)
