DILI, STLTIMORLESTE.com – Kada tinan Dili Institute Of Technology (DIT) simu estudantes foun kuaze hamutuk 1.200.
Asuntu nee hatoo husi Reitor Dili Institute Of Technology (DIT), Salustiano dos Reis Piedade ba jornalista STL iha nia knaar fatin DIT, Kuarta nee (25/03/2026).
“Ami nian estudantes tinan-tinan nee target ba iha 1200, maibe dala ruma ami simu too 1400 ou 15000, tanba kuandu planu atividades lao ona nee dala ruma balun sai fila fali iha fatin seluk, nee duni baibain DIT simu estudantes 1200,” nia dehan.
Reitor DIT nee dehan, sira nian fakuldade haat nee mak hanesan fakuldade petroleum estudy, bisnis and management, engenariu and Cience, tourisme and hospitality, fakuldade haat nee mak daudaun nee eziste hela iha DIT.
Nunee mos Reitor Instituto Ciensia Saude (ICS), Leao Borges hatete, ICS loke tan departamentu foun ho naran departamentu saude desportu fisiolojia, neebe mak daudaun nee simu hela estudantes foun, departamentu ida nee foin loke iha tinan ida nee, tanba nee ICS daudaun nee iha departamentu neen, uluk nee lima, agora aumenta ho ida nee mak neen.
“Ba futuru nee ami iha planu atu loke tan departamentu foun, maibe ba tinan ida nee ami loke ona departamentu foun nee mak hanesan departamentu saude desportu fiziolojia, departamentu ida nee ami foin loke no agora daudaun simu hela estudantes foun. Hau hanoin ami nian departamentu ida nee hetan lisensiamentu husi MESSK, nee ba lisensiatura ninia,” nia esplika.
(jac)
