DILI, STLTIMORLESTE.com – Oras nee daudaun sala aprendizajen ba estudantes Ensinu Baziku Central (EBC) Manleuana sei limitaru sala ba estudantes, kada sala tenke tur sena malu hodi partisipa iha aprendizajen.
Asuntu nee hatoo husi Carlos Correia nuudar Diretor EBC Manleuana ba STL iha nia knaar fatin Manleuana, Kinta (26/03/2026).
“Kona-ba konstrusaun sala foun neen nee too agora seidauk hahu, maske tenta kontaktu ona ita nian parte infraestrutura nasional no parte PAM, maibe sira la atende, tanba nee konstrusaun hee rasik seidauk hahu. Ami nian sala ba estudantes sira sei limitaru hela, tanba nee kada sala estudantes too 60 resin, sira tur sena malu deit hodi partisipa iha prosesu aprendizajen,” dehan nia.
Carlos salienta, agora daudaun sala aprendizajen hamutuk 15, maibe sala nee seidauk sufisiente ba estudantes, tanba nee ba oin presiza aumenta sala de aula, tanba numeru estudantes kada tinan aumenta, ho nunee sala de aula tenke aumenta para estudantes sira bele utiliza ba iha ensinu aprendizajen iha eskola.
“Kada tinan ita nian numeru estudantes nee sempre aumenta, entaun ita presiza atu aumenta sala ba ita nian estudantes sira, tanba ita nian konstrusaun sala neebe husi PAM no infraestrutura nasional, maibe sira seidauk atende,” nia esplika.
Entretantu Superintendente Edukasaun MunisÃpiu Dili, Cesarina C. Guterres hatete, eskola balun presiza halo reabilitasaun no balun halo konstrusaun foun, ho nunee bele aumenta sala de aula ba estudantes sira, tanba eskola balun presiza aumenta sala aprendizajen ba estudantes sira, tanba eskola balun sei menus sala.
“Ita nian eskola balun presiza halo reabilitasaun no balun halo konstrusaun foun, ho nunee bele aumenta sala de aula ba estudantes sira, tanba eskola balun presiza aumenta sala aprendizajen ba estudantes sira, tanba eskola balun sei menus sala ,”katak nia.
(jac)
