DILI, STLTIMORLESTE.com – Prezidente Republika (PR), Jose Ramos Horta apoiu makaas ba emprezaria feto no rekonhese feto iha kapasidade no matenek hodi halo negosiu kompara ho mane.
Prezidente Republika Jose Ramos Horta hatoo lia hirak nee liu husi nia diskursu, bainhira partisipa serimonia “Programa Fundadora Feto Sira” (Female Founders Program) neebe halao iha Platinum Cineplex, Timor Plaza, Kinta kalan (26/03/2026).
Iha serimonia importante nee Prezidente Ramos Horta fo apoiu makaas ba emprezaria feto sira iha serimonia programa fundadora feto sira iha dili.
Seleberasaun hodi selebra esforsu pioneiru husi feto Timoroan sira iha setor privadu, Xefe Estadu elojia sira nia kualidade lideransa neebe inerente, hodi nota ho halimar katak feto sira “tuir natureza no DNA matenek liu fali mane sira.
“Bainhira koalia kona-ba jere negosiu, no elojia sira-nia pasiensia, kuidadu loloos (metikulozidade), no knaar fundamental tantu iha bem-estar família nian no dezenvolvimentu ekonomiku nasional,” dehan Prezidente Republika.
Durante ninia diskursu, Prezidente Ramos-Horta destaka susesu ekonomiku baziku oioin neebe dudu husi feto timoroan sira iha munisípiu sira.
Xefe Estadu elojia emprezaria badinas sira husi Quelicai no louva feto Baguia sira, neebe lidera projetu kreditu karbonu agroflorestal neebe rekonesidu iha nivel global no vale millaun ba millaun dolar, neebe kuda ona ai-oan liu 700.000.
Hanesan Timor Leste sai ona membru plenu ba ASEAN, Prezidente husu ba líder feto sira-nee atu aproveita oportunidade rejional foun sira ho determinasaun no matenek atu kontinua dudu dezenvolvimentu ekonomiku nasaun nian ba oin.
Prezidente mos espresa ninia gratidaun klean ba parseiru internasional sira, ba sira-nia kompromisu firme ba Timor-Leste, partikularmente nota kontinuasaun apoiu husi Australia maski iha tinan difisil pandemia Covid-19 nian.
Prezidente Ramos Horta ho laran-kslolok rekonese ninia belun Peter McMullin husi Good Business Foundation, hamutuk ho Vise-Sekretaria Australia nian Michelle Chan no Embaixadora Kathleen Wilson. Reafirma lasu bilateral neebe forte, serimonia nee sublina vizaun komun ba dezenvolvimentu katak susesu no reziliensia Timor Leste nian iha futuru depende makaas ba empoderamentu ninia feto sira.
(eme)
