DILI, STLTIMORLESTE.com – Prezidente Republika (PR), Jose Ramos Horta hasoru malu ho Scott Morris, Vise Prezidente husi Banku Aziatiku ba Dezenvolvimentu (ADB), konversa krusial dalan ekonomiku Timor Leste (TL) nian.
Tuir komunikadu neebe STL asesu Segunda (30/03/2026) hatete Prezidente Republika Jose Ramos Horta hasoru malu ho Visi Prezidente ADB iha epizodiu foun husi Prezidente Horta Show, Prezidente tuur hamutuk ho Scott Morris, Vise-Prezidente husi Banku Aziatiku ba Dezenvolvimentu (ADB), ba konversa krusial ida kona-ba dalan ekonomiku Timor Leste nian.
Lider nain-rua nee diskute estratejia sira ba diversifikasaun ekonomika ba tempu naruk neebe la depende deit ba Fundu Petroleu, importansia atu investe iha setor sira hanesan agrikultura no turizmu, no mos situasaun nasaun nian hafoin adesaun ba ASEAN.
Iha hasoru malu ne Vise-Prezidente Morris mos fahe hanoin importante sira kona-ba oinsa jere limitasaun fiskal sira hodi garante katak investimentu krusial sira kontinua halo ba povu no futuru nasaun nian.
Epizodiu nee destaka parseiria naruk entre ADB ho Timor-Leste, no mos fo sai informasaun foun sira hanesan akordu kofinansiamentu neebe foin asina atu dezenvolve infraestrutura bee moos neebe vital iha Dili, hamutuk ho diskusaun sira neebe haree ba oin kona-ba modelu seguru ba klima neebe inovador.
(eme)
