BAUKAU, STLTIMORLESTE.com – Autoridade Munisipal Baukau diskute ona ba preparasaun elaborasaun Planu Asaun Anual (PAA) ba tinan 2027.
Sekretariu Munisipal Asuntu Administrasaun no Finansas, Juvinal Daniel Filipe esplika, preparasaun eleboraaaun Planu Asaun Anual 2027 realiza bazeia ba rezultadu reuniaun Konselhu Suku too Asemblea Postu Administrativu (ASPA) neebe finaliza ona planu prioridade sira iha trimestral daruak kontinua trasa planu tuir kalendariu husi Governu Sentral.
“Kada responsavel sira tenki halo planu bazeia ba kompetensia tinan oin atu halo no implementa programa neebe prioridade bazeia ba PDM, nunee ita bele trasa ba orsamentu,” hateten Juvinal Daniel Filipe iha salaun apuramentu Vila Nova Baukau, Kuarta (01/04/2026).
Nia sublina, elaborasaun Planu Asaun Anual refere bazeia ba Planu Dezenvolvimentu Munisipal (PDM) tinan 2025-2030 neebe halo ona revizaun, konsultasaun no aprova liu husi Reuniaun Konselhu Koordeansaun Munisipal (KKM) iha tinan kotuk, neebe planu elaborasaun sira hatoo husi Postu Administrativu no kada diresaun Servisu Munisipal.
Nia fundamenta, iha sorumutu nee Autoridade Munisipa liu husi Ajensia Planeamentu Integradu Munisipal aprezenta formatu Planu Asaun Anual husi Ministeriu Finanas ho kategoria tolu mak hanesan indikador neebe foku ba planu servisu, baseline no meta bazeia ba atinjimentu tinan anterior hodi sai sasukat ba planu orsamentu.
“Hau nia esperansa sira tenki esforsu atu planu ezekusaun nee ho kualidade, katak atinjimentu tuir meta, tanba sai prioridade bazeia ba nesesidade komunidade,” Juvinal Filipe akresenta.
Iha fatin hanesan, Administrador Postu Administrativu Kelikai, Paulo Jacinto Moreira hateten, Planu Asaun Anual ba tinan 2027 Autoridade Postu Kelikai aprezenta atividade rua kompostu programa Administrasaun Postu no Dezenvolvimentu ba Suku bazeia ba rezultadu reuniaun ASPA.
“Ami aprezenta ona ba Autoridade Munisipal, hau espera katak Prezidente Autoridade sei defende ami nia planu nee,” katak Paulo Moreira.
Enkuantu partisipa iha diskute iha Planu Asaun Anual tinan 2027 nee hetan partisipasaun masimu husi kargu xefia sira iha Servisu Munisipal Baukau, inklui Autoridade Postu Administrativu 8.
Entretantu Planu Dezenvolvimentu Munisipal tinan 2025-2030 iha Baukau foku ba setor importante haat mak hanesan dezenvolvementu sosial ba area edukasaun, saude no inkluzaun sosial, dezenvolvementu institusional ba area kapasitasaun liu husi formasaun no treinamentu, infraestrutura foku ba estrada, bee moos inklui eletrisidade no setor ekonomia neebe foku ba planu dezenvolvimentu agrikultura no turizmu.
(tom)
