BAUKAU, STLTIMORLESTE.com – Taxa ezekusaun Orsamentu Jeral Estadu (OJE) 2026 trimestral dahuluk nee, iha Servisu Administrasaun Autoridade Munisipal Baukau foin atinji 17,18%.
Alokasaun OJE 2026 ba Servisu Administrasaun Autoridade Munisipal Baukau hamutuk US$ 13.802.085,00 ba kategoria 5 mak hanesan, salariu vensimentu US$ 2.850.742,00, bens i servisus US$ 765.550,00, tranferensia publikas US$ 7.725.580,00, kapital minor US$ 150.000,00 no kapital dezenvolvementu US$ 2.310.213,00.
Husi alokasaun OJE refere despensa iha Servisu Administrasaun Munisipal Baukau atual US$ 1.734.638,82 ho pursentu 0,13, obrigasaun US$ 84.408,75, komprimisiu US$ 551.648,00, balansu US$ 11.431.389,42 ho total ezekusaun husi orsamentu refere foin atinji 17,18%.
“Autoridade Munisipiu Baukau ninia taxa ezekusaun ezekusaun too data ida ohin total hotu hotu kategoria 5 nee ita atinji 17.18%,” hateten Sekretariu Munisipal Asuntu Administrasaun no Finansas, Juvinal Daniel Filipe ba jornalista sira iha knaar fatin Vila Nova Baukau, (02/04/2026).
Nia esplika, iha trimestral dahuluk husi salariu vensimentu kobre ba funsionariu publiku kompostu permanente, ajente no kazuais atinji 24,02%, bens i servisus kobre ba fornesementu kombustivel, manutensaun no operasional inklui fasilita loro loron atinji 58,41%, transferensia publikas neebe kobre ba programa merenda eskolar lao ona fulan 3, subsidiu ba lideransa komunitaria no operasional suku 62 rematan ona enkuantu PDNS sei iha numeru kiik, tanba sei iha faze aprovizionamentu neebe foin atinji 14,09%.
Kapital minor iha Autoridade Munisipial Baukau atinji ona 100,00%, tanba kompra kompremisiu ba sosa ekipamentu pezadu ida ho valor orsamentu US$ 150.000,00 enkuantu kapital dezenvolvementu ezekusaun sei 0.00%, tanba projetu 29 neebe tuir planu atu implementa liu husi Programa Dezenvolvimentu Integradu Munisipal (PDIM) seidauk implementa.
“Tuir loloos nee 25% maibe nia tun, tanba impaktu iha kapital dezenvolvementu liu liu transferensia PNDS neebe semana oin mak ita bele halao transferensia,” Junival akresenta.
Nia deklara, iha semana daruak segundu trismestral nee ezekusaun iha Autoridade Munisipial Baukau sei aumenta, tanba esforsu ona atu ezekuta orsamentu neebe tutelada iha transferensia publikas kobre ba projetu PNDS 2026 neebe benefisia ba Suku 62 no projetu husi PDIM 29.
(tom)
