DÍLI, STLTIMORLESTE.com – Sarani Katolika iha Timor Leste (TL), ohin Kinta feira selebra misa Kinta Feira Santa ka han kalan ikus, neebe marka inisiu ba Triduu Paskal antes selebrasaun paskua nian.
Iha selebrasaun neebe halao iha kapela Rainha da Paz, Perumnas, Bairo Pite, Dili, nee pontu sentral ritual mak fase ain. Amululik fase eskolante sanuluh resin rua (12) nia ain nuudar simbolu haraik aan no domin neebe Jesus Kristu hatudu ba nia eskolante sira antes nia terus no mate.
Liu husi omilia Amu Selebrante Daniel fo hanoin ba sarani sira katak, asaun neebe Jesus halo hodi fase eskolante sira nia ain laos deit ritual tinan tinan, maibe mandamentu foun ida ba ema hotu.
“Jesus fase eskolante sira nia ain hatudu mai ita katak, domin nee presiza haraik aan no sakrefisiu, neebe transforma liu husi hahalok, sira laos deit ho lia fuan,” dehan Amu Daniel bainhira prezide misa Kinta Feira Santa, iha Kapela Rainha da Paz, Perumnas, Bairo Pite, Díli, Kinta (02/04/2926).
Nunee mos sarani Perumnas, Marta da Costa hatete, selebrasaun nee momentu importante atu refleta kbiit fahe malu nian. ”Ba ami misa Kinta Feira Santa hanorin ami atu labele han mesak, iha tempu situasaun moris todan agora, ita tenki tulun malu, fahe paun ba maluk sira neebe kuran, hanesan Jesus fahe nia isin ba nia eskolante sira,” dehan Marta.
Maski udan, selebrasaun nee lao ho dignu no hetan partisipasaun masinu husi sarani sira. Hafoin misa ritual, kontinua ho transladadaun Santisimu Sakramentu ba Altar Repozisaun, hodi sarani sira kontinua ho adorasaun no vijilia.
Enkuantu ambiente iha area Perumnas hahu tama ba silensiu ka hakmatek, hodi hein ba loron Sesta Feira Santa, loron neebe sarani sira hanoin fali Jesus nia terus no mate iha kruz.
(car)
